Astanada 50 shaqyrym jol jóndeledi
ASTANA. QazAqparat - 2018 jyldyń sońyna deıin elordanyń 65 kóshesindegi joldar ortasha jóndeýden ótetin bolady. Kóshelerdiń 15-i qalanyń ortalyǵynda, 50-i qala shetindegi turǵyn úı alabtarynda ornalasqan. Jóndeletin joldardyń uzyndyǵy 49,9 shaqyrymdy quraıdy, dep habarlaıdy Astana ákimdiginiń resmı saıty.
Óndiris, Ońtústik-Shyǵys, Kóktal jáne Agroqalashyq turǵyn úı alaptarynda 50 kóshedegi joldardyń uzyndyǵy - 18 shaqyrym. Ortasha jóndeý jumystarynyń barysynda asfaltbeton jabyny tóselip, joldardyń negizi salynady.
Astana qalasy Kólik jáne jol-kólik ınfraqurylymyn damytý basqarmasynyń bólim basshysy Asqar Isaqovtyń bergen málimetterine súıensek, búgingi tańda elordanyń shetinde jatqan 5 kóshede joldardy jóndeý jumystary tolyq aıaqtalǵan.
«Búgingi tańda Óndiris, Kóktal, Agroqalashyq turǵyn úı alaptary men Ońtústik-Shyǵys shaǵynaýdanyndaǵy 23 kóshede uzyndyǵy 10, 5 shaqyrymdy quraıtyn joldar salynyp jatyr. 5 kóshede jóndeý jumystary tolyǵymen aıaqtaldy. 1 shildege deıin qalǵan kóshelerdi paıdalanýǵa berý josparlanýda. Joldar kezeń-kezeńimen jyl sońyna deıin paıdalanýǵa beriledi», - dep málimdedi Asqar Isaqov.
Qalanyń shet aýmaqtaryn damytý sheńberinde osy jyly, sondaı-aq Kóktal-2 turǵyn úı alabynda 8 kóshedegi joldar salynyp, qaıta jańartylyp, jaryqtandyrylatyn bolady. 8 kóshedegi joldardyń jalpy uzyndyǵy - 3,2 shaqyrym. Bul kóshelerdegi úılerge ınjenerlik jeliler de tartylady dep kútilýde.
Eske salaıyq, 2008 jyly Astanada «Qalanyń shet aýmaqtaryn damytý» tujyrymdamasy qabyldanǵan bolatyn. Onyń aıasynda 2020 jylǵa deıin elordada joldardyń 232,38 shaqyrymy, ınjenerlik jelilerdiń 900,3 shaqyrymy salynbaq.
