Astanada 50 paıyzǵa deıingi jeńildiktermen mektep jármeńkesi ótedi
ASTANA. 14 tamyz. QazAqparat - 24 jáne 30 tamyz kúnderi Astana qalasynyń eski ortalyq alańynda «Mektepke jol» atty jyl saıynǵy altynshy respýblıkalyq aktsııasy aıasynda mektep jármeńkesi ótedi.
Bul týraly astana.kz saıtyna qalalyq Kásipkerlik jáne ónerkásip basqarmasynan habarlady.
Bıyl jármeńkege Astana, Almaty, Qaraǵandy jáne Shymkent qalalarynan 28 kásipker qatysady. Aktsııa barysynda mektep formalary, oqýlyqtar, túrli kitaptar, sómkeler, keńse zattary, mektepke arnalǵan aıaq kıimder men kıim-keshekter jáne taǵy basqalary satylady.
Mektep formalaryn 50 paıyz, al mektepke arnalǵan jazý quraldaryn 30 paıyz tómendetilgen baǵamen satyp alýǵa bolady. Sonymen qatar atalmysh alańda jármeńke kúnderi Oqýshylar saraıynyń, mýzyka, óner mektepteri tárbıelenýshileriniń qatysýymen kontsertter uıymdastyrylady.
