Astanada 50 metrlik qaıyrymdylyq dastarxany jaıyldy
ASTANA. QazAqparat - Astanadaǵy «Máńgilik el» alańynda 1-mamyr - Qazaqstan xalqynyń birligi kúnine arnalǵan merekelik dastarxan jaıyldy. Qaıyrymdylyq sharadan túsken barlyq qarajatty qaterli isik aýrýyna shaldyqqan alty jasar Aıymjan Dosjannyń em-domyna aýdarý josparlanyp otyr, dep xabarlaıdy QazAqparat tilshisi.
«Qazaqstan xalqy Assambleıasynyń astanalyq bólimshesi dál mamyrdyń 1-i kúni bundaı qaıyrymdylyq sharasyn alǵash ret uıymdastyryp otyr. Buǵan deıin de talaı sharalar uıymdastyryldy. Biz naqty bir balany tańdap, kómek berýge tyrysamyz. Máselen, búgin kishkentaı Aıymjan Dosjanǵa aqsha jınap jatyrmyz. Ony Germanııada emdeý úshin 150 myń eýro qajet. Osy ýaqytqa deıin basqa aımaqtarda qaıyrymdylyq aktsııalary ótken bolatyn. Bul joly biz de óz úlesimizdi qosqandy jón kórdik. Osylaısha, san alýan ulttyń ókilderi birlik kúnin sóz júzinde emes, is júzinde atap otyr. Jalpy, sońǵy eki jyl boldy, Qazaqstan xalqy Assambleıasy qaıyrymdylyq sharalaryn belsendi túrde ótkizip keledi. Osynyń ózi uıymnyń ózgege kómek bere alatyn deńgeıge jetkenin kórsetse kerek», - dedi Astana qalalyq Qazaqstan xalqy Assambleıasy xatshylyǵynyń meńgerýshisi Lıazzat Qusaıynova QazAqparat tilshisine bergen suxbatynda.
Búgingi qaıyrymdylyq dastarxanynda san alýan ulttardyń taǵamdarynan dám tatýǵa múmkindik bar. Baǵasy da qymbat emes. Bul jerde xaltymysh, chapılgısh, bırx, dýk sııaqty sheshen-ıngýsh taǵamdary, káris salattarynyń bes túri, kadıýrı, tımpenı (kúrish nany), ázerbaıjandar usynǵan xamplov, dolma, kebab, lıýlıa-kebab, lavash, gýtab, nemistiń shtrýdeli men krebeli, ózbek pen qaraqalpaqtyń palaýy, polıak xalqynyń bıgýsy, armıandar pisirip alyp kelgen xachapýrı, dolma, lavash, ýkraın xalqynyń varenıkteri, tatardyń bálishi, qystybyı, tatarsha azý, ýchpýchmak pen orama, dúngender jasaǵan laǵman, ganfan, manty, orystardyń bálishteri men quımaqtary, túrikterdiń óz qolymen jasaǵan pıde, laxmandýn, sıgara borek, ıapraksarma, adanakebab pen doner, daǵystan xalqynyń xınkaly, samsasy men chýdýsy, túrkimender alyp kelgen kýtab, chekterme bar. Grýzındar bolsa, borjomı, vıno, xachıpýrı, lımonad, tipti cha-chasyn da alyp kelgen.
«Máńgilik el» alańyndaǵy merekelik sharalar aıasynda qazaq kúresi, arqan tartý men asyq atýdan saıystar uıymdastyryldy. Al úlken saxanada etnomádenı birlestikterdiń kontserti ótip jatyr.
