Astanada 50 memlekettiń keden qyzmetteri basshylary kezdesý ótkizýde
ASTANA. QazAqparat - Astanada Dúnıejúzilik keden uıymynyń eýropalyq óńiriniń kedendik qyzmetteri basshylarynyń konferentsııasy jumysyn bastady. Sharaǵa 50 eldiń keden salasynyń basshylary qatysýda.
Shara qatysýshylaryna QR Premer-Mınıstri Kárim Másimov úndeý joldady. Onyń úndeýin birinshi vıtse-peremer Baqytjan Saǵyntaev oqyp berdi.
«21 ǵasyr - joǵary jyldamdyqtardyń ǵasyry. Adamdar, taýarlar, qyzmetter men aqparattar óte jyldam qozǵalýda. Barsha álemde saqtalyp otyrǵan málimetterdiń 90 paıyzy tek eki jylda quraldy. Búginde biz barshamyz sandyq dáýirge aýysýdyń kýágerimiz. Bul trend ómirdegi barlyq salalardy qamtyp otyr»,-deıdi Úkimet basshysy.
Ol óz kózinde keden qyzmeti syrtqy ekonomıkalyq qyzmettiń júıe quraýshy elementi bolyp tabylatynyn jáne ár eldiń ekonomıkalyq damýynda strategııalyq róldi atqaratynyn atap ótti. Osy rette keden organdary arasynda aqparat almasý bul saladaǵy ilgerileýdiń negizgi faktory bolyp otyr. Bul turǵyda Dúnıejúzilik keden uıymy osy úderiste kóshbasshy rólde.
K. Másimov Qazaqstan halyqaralyq saýdanyń normalary men erejelerin jetildirýde belsendi qatysyp otyrǵanyn, sondaı-aq Dúnıejúzilik saýda uıymynyń múshesi bola otyryp, saýdanyń qaýipsizdigi men ony jeńildetýge erekshe mán berip otyrǵanyn jetkizdi.
Sóz sońynda Premer-Mınıstr Qazaqstan óziniń tranzıttik áleýetin belsendi túrde arttyryp kele jatqanyn jáne saýda qatynastaryn nyǵaıtýǵa umtylyp otyrǵandyǵyn atap ótti.
