Astanada 50-den astam adam tirkelgen 100-ge jýyq úı anyqtaldy
ASTANA. QazAqparat - Astanalyq polıtseıler arnaıy shara barysynda bir úıge 50 jáne odan da kóp adam tirkelgen 600-ge jýyq úıdi anyqtady. Bul týraly QR ІІM-niń baspasóz qyzmeti málim etti.
Baspasóz málimetine qaraǵanda, memlekettik organdardyń aqparattyq júıelerin ıntegratsııalaý jáne «Elektrondyq úı kitapshasyn» qurý mekenjaı boıynsha azamattardyń kóp tirkelýin anyqtaýǵa múmkindik berdi.
Qazirgi ýaqytta respýblıka boıynsha bir úıde 50-den bastap odan da kóp adam tirkelgen 586 mekenjaı anyqtalǵan. Bul rette tek Astana qalasy boıynsha kóp adam tirkelgen 100 mekenjaı anyqtaldy.
Aǵymdaǵy jylǵy 7 qarashadan bastap ІІM «Ýchaske» jedel-profılaktıkalyq is-sharalar sheńberinde turǵylyqty jeri, onyń ishinde qonaqúılerde, hostelderde, jataqhanalarda, turǵyn úıler men páterlerde tirkeýsiz turyp jatqan adamdardy anyqtaý boıynsha jumystardy júrgizýde.
Polıtsııa qyzmetkerleri turǵyn úı ıelerin jáne ondaǵy turyp jatqan adamdarmen turǵylyqty jeri boıynsha tirkelý qajettigi máselesin túsindirip, durys tirkelmegen jaǵdaıda ákimshilik jaýapqa tartylatyny týraly eskertýde.
Kóshi-qon zańnamasyn buzǵandar jaýapkershilikke tartylady. Osylaısha, bir aıdyń ishinde zańnama buzǵan 16,4 myń adam anyqtaldy. Onyń 15,3 myńy turǵylyqty jeri boıynsha tirkeýsiz turǵandar jáne 1,1 myńǵa jýyǵy úıinde turǵan adamdardy tirkeýden jaltarǵan turǵyn úı ıeleri.
Bul rette, búgingi kúni ákimdikter kommýnaldyq qyzmetterge esepterdi naqtylaý úshin mekenjaıda tirkelgen adamdar sanyn aqparattyq júıede kóre alady.
Sondaı-aq osyndaı mekenjaılardy anyqtaý kezinde salyq organdarymen turǵyn úıdi jalǵa berý boıynsha kásipkerlik qyzmetpen aınalysýǵa quqyǵynyń bolýy tekseriledi.
