Astanada 5 jyl ishinde «Mektepke jol» aktsııasy arqyly 17 myń balaǵa kómek kórsetilgen
ASTANA. 1 tamyz. QazAqparat - Búgin elimiz boıynsha oqýshylardyń mektepke barýyn tolyq qamtamasyz etý týraly Memleket basshysynyń tapsyrmasyn oryndaý maqsatynda,
QR Bilim jáne ǵylym mınıstrliginiń bastamasy boıynsha «Mektepke jol» jalpy respýblıkalyq aktsııasy bastaldy. Bul týraly Astanadaǵy «Báıterek» halyqaralyq medıa-ortalyǵynda ótken baspasóz máslıhatynda Astana qalalyq balalardyń quqyqtaryn qorǵaý jónindegi basqarma basshysy Rımma Imanǵazınova málimdedi.
Sharanyń maqsaty - oqýmen qamtylmaǵan balalardy anyqtaý, jańa oqý jylyna daıyndyq kezinde tabysy tómen jáne kóp balaly otbasynan shyqqan mektep oqýshylaryna, jetim balalar men ata-anasynyń qamqorlyǵynsyz qalǵan balalarǵa qoldaý kórsetý.
«Aktsııa ótkizilgen 5 jyl ishinde Astana qalasynda 17 myńnan astam bala jalpy kólemi 149 mln-nan astam teńgege materıaldyq kómek alǵan. Onyń ishinde bıýdjet esebinen 12 myńnan astam bala qamtylsa, 5 myńnan astamy bıýdjetten tys qarajattan kómek kórgen», - dep atap ótti Rımma Imanǵazınova.
Onyń aıtýynsha, 2012 jyly 3 myńnan astam muǵalimniń kúshimen 98 myńdaı úı qamtylyp, mektepke bara almaı qalǵan balalardyń barlyǵyna tıisti kómek kórsetilgen.
«Qaıta qurylǵan Astana qalalyq balalardyń quqyqtaryn qorǵaý jónindegi basqarma 36 mekemege aktsııaǵa shaqyrý hattaryn jiberip úlgergen. Búginde solardyń 20-dan astamy sharaǵa belsene qatysýǵa daıyn ekendikterin bildirip otyr», - dedi ol.
Basqarma basshysy atap ótkendeı, bıyl da jyldaǵy dástúr boıynsha Astananyń ortalyq alańynda 24 jáne 30 tamyz kúnderi mektep jármeńkesi ótkiziledi. Onda mektep formasy, keńse taýarlary, oqý quraldary qoljetimdi baǵamen satylatyn bolady.
Sondaı-aq, qalanyń alańdary men basty kóshelerine aktsııanyń logotıpi men jedel jeli telefondarynyń nómirleri beınelengen bannerler ilingendigi týraly aıta kele, R. Imanǵazınova turǵyndardyń osy baılanys jelileri arqyly qandaı da bir jaǵdaımen mektepke barýǵa múmkindigi bolmaı júrgen búldirshinder týraly aqparat berip, olarǵa kómektese alatyndyǵyn jetkizdi.
