Astanada 5 jańa balabaqsha paıdalanýǵa beriledi - Á. Bımendına
ASTANA. Qazannyń 19-y. QazAqparat /Jasulan Amanbaıuly/ - Jyldyń sońyna deıin Astanada 5 jańa balabaqsha paıdalanýǵa beriledi. Bul týraly búgin elordada ótip jatqan «Bilim berýdiń etnopedagogıkalyq negizderi: teorııa jáne tájirıbe» atty halyqaralyq konferentsııada Astana qalasy Bilim basqarmasynyń bastyǵy Ásıma Bımendına málim etti.
Onyń aıtýynsha, Elbasynyń bastamasymen qolǵa alynǵan «Balapan» baǵdarlamasy aıasynda bıyldyń ózinde 18 balabaqsha paıdalanýǵa berilgen. «Jyldyń sońyna deıin taǵy 5 balabaqsha salynyp bitedi degen boljam bar», - deıdi Bilim basqarmasynyń basshysy.
«Bizdiń balalarymyz sapaly bilim qyzmetterine ıe bolsyn desek, eń birinshi ol úshin jaǵdaıdy qamtamasyz etýimiz kerek», degen ol, qazirgi ýaqytta qalada 20 myńnan astam búldirshin balabaqsha qabyrǵasynda tárbıelenip jatqandyǵynan habardar etti.
«Balapan» baǵdarlamasynyń sheńberinde ǵana, jyl sońyna deıin biz 12 myń búldirshindi balabaqshalarǵa ornalastyramyz. Búgingi tańda olardyń 7 myńy mektepke deıingi bilim mekemelerine alyndy», - dep atap kórsetti Á. Bımendına.
Bilim basqarmasynyń derekteri boıynsha, 2008 jyly 38 memlekettik balabaqsha bolsa, búginde Astanada 57 memlekettik balabaqsha bar.
