Astanada 5-shi Dúnıejúzilik kóshpendiler oıyndaryna arnalǵan óńirler sherýi ótti
ASTANA. KAZINFORM – Astanada Qazaqstannyń 20 óńirinen 200-den astam ókildiń qatysýymen «Birlik kerýeni» atty aýqymdy is-shara ótti. Sportshylardan, batyrlardan jáne qoǵam qaıratkerlerinen quralǵan kerýen ár óńirdiń dástúrli stılinde bezendirilip, sherý jasady, dep jazdy elorda ákimdiginiń resmı saıty.
Kerýenniń basty mindeti – óńirlerden elordaǵa oıyndar tarıhynyń ajyramas bóligi bolyp sanalatyn qasıetti sýdy oıyndardyń ashylý saltanatyna jetkizý. «Birlik kerýeni» 5-shi Dúnıejúzilik kóshpendiler oıyndarynyń ashylý saltanatynyń basty kıeli elementi retinde qasıetti sýdy paıdalaný dástúrin jalǵastyrady.
Saǵat 16.00-den bastap EKSPO aýmaǵynda elorda turǵyndary men qonaqtary aldynda dı-djeı óner kórsetip, ınteraktıvti oıyndar ótkizildi. Odan ári saǵat 17.00-de teatrlandyrylǵan baǵdarlamamen jáne 20 óńirden kelgen ókilderdiń sherýi arqyly resmı ashylý ótti.
Qatysýshylar men kórermender aldynda Astana ákimi Jeńis Qasymbek pen QR Sport jáne týrızm mınıstri Erbol Myrzabosynov quttyqtaý sóz sóıledi.
Іs-shara barysynda kerýen elimizdiń barlyq óńirinen jınalǵan qasıetti sýdy Astanaǵa jetkizdi. Bul sý Qazaqstan halqynyń ortaq kúshi men birligin bildiredi. Sherýdi shyǵarmashylyq ujymdar men qazaqstandyq estrada juldyzdary jalǵastyrdy.
Іs-shara barysynda «Royal beats» barabanshylar ansambli, «Joshy» toby, sondaı-aq Aro, Qýandyq Rahym, Marjan Arapbaeva, Ǵazızhan Shekerbek, Aqbota Kerimbekova, Ayree, Mıras Júginisov jáne «Báıterek» toby sekildi óner ıeleri kontsert ótkizdi.
Іs-shara EKSPO aýmaǵynda ótti.
Esterińizge sala keteıik, osyǵan deıin elimizdiń ár óńiriniń kıeli sanalatyn bulaq kózinen torsyq toly sý jınalǵan bolatyn. Dál osy sý 5-shi Dúnıejúzilik kóshpendiler oıyndarynyń ashylý saltanatynyń negizgi elementi bolmaq.
Aıta keteıik, 5-shi Dúnıejúzilik kóshpendiler oıyndary Astanada 8-13 qyrkúıek aralyǵynda ótedi. Oǵan álemniń 89 elinen 2500-den astam adam qatysady.
