Astanada 5 mln teńge dekrettik járdemaqyny zańsyz alý isi tergelýde
ASTANA. QazAqparat - Astanada somasy 5 mln teńgeden asatyn dekrettik járdemaqyny zańsyz alý isi tergelýde, dep habarlaıdy «QazAqparat» HAA tilshisi elordanyń memlekettik kirister departamentiniń baspasóz qyzmetine silteme jasap.
Astana qalalyq MKD ekonomıkalyq tergeý qyzmetiniń óndirisinde QR QK 190-baby 3-tarmaǵy 1-tarmaqshasy boıynsha Sotqa deıingi tirkeýdiń biryńǵaı tirkelimine 28.03.2017 jyly júktilik pen bala týýǵa beriletin áleýmettik járdemaqyny jalǵan qujattarmen zańsyz alý faktisi tirkelgen.
2011 jyldyń 1 qańtarynan 2013 jyldyń 30 shildesi aralyǵynda 400-den astam áıel júktilik pen bala týý járdemaqysyn alý úshin «Áleýmettik tólemder jónindegi vedomstvoaralyq esep aıyrysý ortalyǵy» (ZTMO) departamentine shaǵymdanǵan. ZTMO qyzmetkerleri Astana qalalyq ZTMO bólimshesine júktilik pen bala týý boıynsha áleýmettik tólemderdi taǵaıyndaý isine tekserý júrgizildi. Tekserý nátıjesi boıynsha, áıelder jumys berýshilerdiń - jeke kásipkerlerdiń atynan júktilikke jáne bala týýǵa baılanysty tabystardy joǵaltý boıynsha járdemaqy alý úshin aýdandyq bólimshelerge qujattar ótkizgen.
Jeke kásipkerlerdi tergeý barysynda mundaı áıelderdiń jumys istemegendigi jáne sáıkesinshe, JK atynan qujattardyń usynylmaǵandyǵy anyqtaldy. Memlekettik qarjyny zańsyz alý faktisi boıynsha tergeý-jedel is-sharalary júrgizildi.
№2 Saryarqa aýdandyq soty 1 tamyz kúni kúdikti M.B.Shyndáýletovtiń jyljymaly jáne jyljymaıtyn múlkine tyıym saldy. Ol qylmystyq is boıynsha kúdikti dep tanylyp, 2 aıǵa deıin qamaýda ustaý túrindegi bultartpaý sharasy qoldanyldy. 4 tamyz kúni A.E.Sádýaqasova qylmystyq is boıynsha kúdikti dep tanylyp, oǵan qatysty «kepil» túrindegi bultartpaý sharasy qarastyryldy.
13 oqıǵa boıynsha memleket múddesiniń zalaly 5 181 288 teńgeni qurady. Ol qazirgi tańda tolyqtaı óteldi.
