Astanada 5 kúnde 1,5 myńnan astam jol erejesin buzý faktisi tirkeldi
ASTANA. KAZINFORM — Elordada jyl basynan beri 56 myńnan astam turaq erejesi buzylǵan.
Bul zańbuzýshylyqtar 15-19 sáýir aralyǵynda ótken «Turaq» jedel-profılaktıkalyq is-sharasy barysynda tirkelgen. Astana qalasy Polıtsııa departamenti Ákimshilik polıtsııa basqarmasy bastyǵynyń orynbasary, polıtsııa podpolkovnıgi Mahambet Tóleshovtiń aıtýynsha, sharanyń basty maqsaty — joldaǵy tártipti kúsheıtip, apatty azaıtý.
— Іs-shara barysynda turaqtarǵa kólikti durys qoımaý derekterine erekshe nazar aýdaryldy. Sonymen qatar jol belgileri men tańbalaryn saqtamaý, qıylystar men jaıaý júrginshiler ótkelderinen ótý erejelerin buzý faktileri de jıi qaıtalandy, — dedi ol.
Nátıjesinde jol belgileri men tańbalaryn saqtamaǵan 685 derek tirkelgen. Sondaı-aq 700-den júrgizýshi durys toqtamaı, turaq erejesin buzǵan.
— Kólik quraldaryn tek arnaıy belgilengen oryndarǵa qoıý qajet. Trotýarlarda, balalar jáne sport alańdarynda, sondaı-aq arnaıy tehnıkanyń júrýine kedergi keltiretin jerlerde kólik qoıýǵa bolmaıdy, — dep atap ótti Mahambet Tóleshov.
Polıtsııa ókiliniń málimetinshe, jyl basynan beri elordada 56,5 myńnan astam turaq erejelerin buzý deregi tirkelgen. Onyń ishinde 11 900-den astam hattama rásimdelgen.
Qabyldanǵan sharalar aıasynda 53 kólik aıypturaqqa qoıylyp, 922 avtokóliktiń memlekettik nómirleri alynyp, paıdalanýǵa tyıym salyndy.
Aıta keteıik, Almatyda avtoturaq erejelerin buzǵan 15 myń júrgizýshi aıyppul arqalady.
