Astanada 5-qabattan sekirmek bolǵan azamatty kim qutqardy
ASTANA. QazAqparat - Elordanyń qalalyq ishki ister departamenti turǵyn úılerdiń biriniń 5-shi qabatynan sekirmek bolǵan azamatty qutqarǵan polıtsııa qyzmetkeriniń aty-jónin jarııa etti, dep habarlaıdy QazAqparat tilshisi.
«Atalǵan azamatty Almaty aýdandyq ishki ister basqarmasynyń aǵa jedel ýákili, polıtsııa kapıtany Erbol Salyqov qutqaryp qaldy», - dep atap ótti departamenttiń baspasóz qyzmetinen.
Qyzmeetin atqaryp júrgen Erbol Salyqov kópqabatty bıik úılerdiń janynan ótip bara jatyp, 5-shi qabatta tereze jaqtaýynda salbyrap turǵan azamatty kórgen. Oqıǵanyń qaıǵyly aıaqtalaryn baǵamdaǵan polıtsııa qyzmetkeri birden besinshi qabatqa kóterilip, páterdiń esigin qaqqan. Alaıda, esikti eshim ashpaǵan.
«Osydan keıin ol esikti syndyrmaq boldy. Biraq osy sátte ishten áıel adam esikti ashty. Ol birden bólmege júgirip kirip, terezede turǵan adamdy ustap alyp, bar kúshimen tartyp ishke kirgizgen. Jedel ýákildiń shuǵyl áreketiniń arqasynda qaıǵyly oqıǵa oryn alǵan joq. Astana qalalyq ishki ister departamenti Erbol Salyqovqa alǵys jarııalady», - dedi departamentten.
Esterińizge sala ketsek, biz buǵan deıin Astanada turmystyq janjal saldarynan er adamnyń 5-qabattan sekirmek bolǵanyn habarlaǵan edik.
