Astanada 49 adam 82 mln teńgesinen aıyrylyp, san soǵyp qaldy

ASTANA. KAZINFORM — Tabysty kásipkerdiń keıpine kirgen alaıaq klıentterin aldap soǵyp, Reseı Federatsııasynan básekege qabiletti baǵamen eden satyp alý múmkindigi bar dep jańylystyrǵan. Bul týraly Astana qalasynyń prokýratýrasy málim etti.

Azamattardyń senimine kirgen alaıaq jalǵan kelisim-shart jasaý arqyly tutynýshylaryna san soqtyrdy. 

— Sottalýshy áleýetti satyp alýshylardy áleýmettik jelilerde óziniń jalǵan áreketterin belsendi túrde jarnamalaı otyryp, shetelden qurylys materıaldaryn jetkizýde qalyptasqan baılanystar týraly sendirgen. Mysaly, jábirlenýshilerdiń birine 6 mln teńgeden astam zalal keltirilgen, bul qarajatty qylmysker óz qalaýy boıynsha jumsaǵan, - delingen habarlamada.

49 adam — jalpy somasy 82 mln teńgeden astam shyǵynǵa batty. 

Sotta prokýrorlar sottalýshynyń óz mindettemelerin oryndaýǵa naqty múmkindigi bolmaǵanyn, jetkizý sharttaryn óziniń qylmystyq nıetin iske asyrý maqsatynda jasaǵanyn, jymqyrylǵan aqshalaı qarajatty jeke maqsatta jumsaǵanyn dáleldedi.

Sonymen qatar, sotty bolǵan adam osyǵan uqsas alaıaqtyq faktileri úshin buryn bas bostandyǵynan aıyrý oryndarynda jazasyn ótegeni anyqtaldy.

Dáleldemelerdiń bultartpas bolýyna baılanysty sottalýshy óz kinásin tolyq moıyndady.

Qylmysker 4 jyl 8 aıǵa bas bostandyǵynan aıyrý jazasyna sottaldy, jábirlenýshilerdiń azamattyq talaptary tolyǵymen qanaǵattandyryldy. Úkim zańdy kúshine endi.

Elorda prokýratýrasy azamattardy saq bolýǵa jáne kúmándi mámilelerge barmaýǵy shaqyrady.

Eske sala keteıik, buǵan deıin Ulytaý oblysynda qarjylyq pıramıda uıymdastyrǵan azamat sottalǵanyn jazǵan edik.