Astanada 48 mln teńgeniń esirtkisi tárkilendi
ASTANA. QazAqparat - Astanada 48 mln teńgeniń esirtkisi tárkilendi. Bul týraly QR ІІM Memlekettik til jáne aqparat departamentiniń dırektory Almas Sadýbaev aıtty, dep habarlaıdy QazAqparat tilshisi.
Onyń aıtýynsha, Astana qalalyq ІІD esirtki bıznesimen kúres basqarmasynyń qyzmetkerleri elorda aýmaǵynda esirtki zattaryn satýmen aınalysatyn tulǵalardy ustaý boıynsha arnaıy operatsııa júrgizgen. Jedel izdeý sharalaryn júrgizý barysynda elorda kósheleriniń birinen buryn sotty bolǵan qala turǵyny 2 gramm geroınmen ustalǵan.
«Kúdikti turǵyn jatqan baspanany tekserý barysynda salmaǵy shamamen 4 keli bolatyn geroın tabyldy. Ol esirtki zattaryn óziniń senimdi adamdary arqyly taratqany belgili boldy jáne olar da iri kólemde esirtki zattaryn zańsyz saqtaǵany úshin ustaldy. Arnaıy operatsııa barysynda zańsyz aınalymnan shamamen 12 ret qoldanýǵa bolatyn esirtki dozasy tárkilendi. Bul esirtkiniń «qara naryqtaǵy» quny aqshaǵa shaqqanda 48 mln teńgeden asyp jyǵylady»,- dedi ol.
Almas Sadýbaevtyń málimetinshe, qazirgi ýaqytta ustalǵandarǵa qatysty QR Qylmystyq kodeksiniń 296-baby 4 tarmaǵyna jáne 297-baby 3-tarmaǵyna sáıkes qylmystyq is qozǵaldy.
