Astanada «4739» derekti fılminiń premerasy ótti
ASTANA. KAZINFORM - Astanada aǵza transplantatsııasy, transplantolog dárigerlerdiń eńbegi jáne ómirlik mańyzy bar operatsııany kútip júrgen adamdardyń taǵdyry týraly baıandaıtyn «Habar» agenttiginiń «4739» derekti fılminiń tusaýkeseri ótti, dep habarlaıdy Úkimettiń baspasóz qyzmeti.
Іs-sharaǵa QR Premer-mınıstriniń orynbasary – mádenıet jáne aqparat mınıstri Aıda Balaeva, densaýlyq saqtaý mınıstri Aqmaral Álnazarova, belgili dárigerler, ǵalymdar, qoǵam qaıratkerleri, retsıpıentter men olardyń otbasylary, sondaı-aq fılmniń avtorlary men keıipkerleri qatysty.
Aıda Balaeva Memleket basshysy Qasym-Jomart Toqaev ult densaýlyǵy elimizdiń basty qundylyqtarynyń biri ekenin únemi atap kórsetetinin aıtty. Prezıdent Qazaqstanda aǵza transplantatsııasynyń júıeli túrde damyp kele jatqanyn jáne otandyq dárigerlerdiń kásibı deńgeıi joǵary ekenin de atap ótken bolatyn. Búginde mamandarymyz zamanaýı tehnologııalardy, jan-jaqty daıyndyqty jáne tutas bir komandanyń úılesimdi jumysyn talap etetin asa kúrdeli operatsııalardy jasap keledi.
-Jańa Konstıtýtsııada ár adamnyń ómir súrý quqyǵy eshkim aıyra almaıtyn eń qymbat qundylyq retinde aıqyndalyp, azamattardyń densaýlyǵyn qorǵaýǵa memleket kepildik beretini bekitilgen. Bul – memleketke úlken jaýapkershilik júkteıtin qaǵıdat. Sondyqtan densaýlyq saqtaý júıesi adam ómirin saqtap qalýdyń barlyq múmkindigin – aýrýdyń aldyn alýdan, ony der kezinde anyqtaýdan bastap, kúrdeli emdeý tásilderi men transplantatsııaǵa deıin – tolyq ári tıimdi paıdalanýǵa tıis. Úkimet transplantatsııa júıesin odan ári jetildirýge, medıtsınalyq uıymdardyń kásibı áleýetin nyǵaıtýǵa jáne halyqqa túsindirý jumystarynyń sapasyn arttyrýǵa basa mán beredi. Sebebi, árbir azamattyń ómiri men densaýlyǵyn qorǵaý – memleket úshin buljymas ári eń joǵary basymdyq, — dedi Premer-mınıstrdiń orynbasary.
Fılmniń «4739» dep atalýynyń ózindik máni bar. Búginde aǵza transplantatsııasyn kútý tiziminde dál osynsha adam tur. Olardyń basym kópshiligi úshin transplantatsııa – ómirin saqtap qalýdyń jalǵyz múmkindigi. Jyl saıyn 350-den astam patsıent qajetti operatsııany kútpesten kóz jumady. Sonymen qatar elimizdegi transplantatsııa operatsııalarynyń shamamen 90%-y tiri týystyq donorlardyń qatysýymen jasalady. Al qaıtys bolǵannan keıingi donorlyqtyń úlesi 10%-ǵa da jetpeıdi.
Sońǵy bes jylda elimizde 1 500-ge jýyq aǵza transplantatsııasy jasaldy. Onyń árbir tórtinshisi 2025 jylǵa tıesili. Tek ótken jyldyń ózinde búırek, baýyr, júrek jáne ókpe transplantatsııasy boıynsha 310 operatsııa jasaldy.
Balalar transplantologııasynyń damýy da mańyzdy jetistikke aınaldy. 2026 jyly elimizde alǵash ret balaǵa júrek transplantatsııasy sátti jasaldy. Bul joǵary tehnologııalyq medıtsınalyq kómekti damytýdyń jańa kezeńine jol ashty.
Búginde elektrondyq úkimet portaly arqyly qaıtys bolǵannan keıingi donorlyqqa qatysty óz ustanymyn 172 283 adam bildirgen. Olardyń 16 109-y kelisim berse, 156 174 azamat bas tartqan.
Halyqtyń habardarlyǵyn arttyrý jáne qoǵamda ashyq pikir almasý azamattardyń sanaly sheshim qabyldaýyna múmkindik beredi. Mundaı sheshim bolashaqta qutqarýshy transplantatsııany áli de kútip júrgen adamdarǵa ómir súrýge múmkindik syılaýy múmkin.
24KZ telearnasynyń jýrnalısi Nazerke Toqjan men rejısser Berik Sharov túsirgen týyndy patsıentterdiń, olardyń otbasylary men medıtsına qyzmetkerleriniń shynaıy oqıǵalary arqyly adam ómiriniń qundylyǵy, jaýapkershilik, der kezinde qabyldanǵan sheshimniń mańyzy týraly máselelerdi kóteredi. Fılm túrli kózqarastar men ómirlik ustanymdarǵa qurmetpen qaraı otyryp, aǵza transplantatsııasy jóninde qoǵamda ashyq áńgime órbitýge yqpal etýdi kózdeıdi.
Derekti fılmdi 24 shilde kúni saǵat 19:30-da 24KZ telearnasynan kórýge bolady.
Semeıde «Hronıkadan bolashaqqa» respýblıkalyq kınolektorııi ótti.
