Astanada 44 emhana azamattardy tirkeýge daıyn
ASTANA. QazAqparat - Elimizde emhanaǵa tirkelý naýqany bastaldy. Jyl saıynǵy dástúrli kampanııa eki aıǵa sozylady, dep habarlaıdy QazAqparat «Áleýmettik medıtsınalyq saqtandyrý qorynyń» Astana fılıalyna silteme jasap.
Tirkelý naýqany sheńberinde qazaqstandyqtar, QR aýmaǵynda turǵylyqty turatyn shetel azamattary jáne azamattyǵy joq tulǵalar emhanany erkin tańdaý quqyǵyn paıdalana alady.
Astana qalasy boıynsha bastapqy medıtsınalyq-sanıtarlyq kómek kórsetetin 44 densaýlyq saqtaý sýbektisi turǵyndardy tirkeýge daıyn. Onyń ishinde 31 medıtsınalyq uıym tirkelgen halyqpen burynnan jumys jasap kelse, 13 mekeme - qalalyq qordyń qyzmet kórsetýshiler tizimine jańadan enip, naýqanǵa qatysýǵa alǵash ret nıet bildirgen jeke menshik emhanalar ekenin aıta ketken jón.
«Astanada eki jyl burynǵy tirkeý naýqanynyń qorytyndysy boıynsha 1 034 mln adam emhanalarǵa tirkeldi. Qala turǵyndary sanynyń dınamıkalyq ósýine baılanysty bıyl bul kórsetkish ózgeredi dep kútilýde», - deıdi «ÁMSQ» KEAQ Astana qalasy boıynsha fılıalynyń dırektory Nurlybek Qabdyqaparov.
Astana qalasy turǵyndarǵa medıtsınalyq qyzmet kórsetý boıynsha 556 ýchaskege bólingen. ıAǵnı, qazirgi tańda bir dárigerge júktelgen júkteme - 1859 adam. Kelesi jyldan bastap dárigerlerge túsetin júkteme men emhanadaǵy kezekti azaıtý maqsatynda tirkeý shegi belgilenedi. Ol boıynsha bir jalpy praktıka dárigerine tirkeletin adam sany 1700-den aspaýy tıis.
Emhanaǵa qalaı tirkelýge bolady? Ol úshin azamattar tańdaǵan medıtsına uıymyna tikeleı baryp nemese elektrondy úkimet portaly arqyly onlaın rejimde jáne Halyqqa qyzmet kórsetý ortalyqtary arqyly tirkele alady. Emhana arqyly tirkelý úshin jeke kýáligińizdi alyp, bas dárigerdiń atyna ótinish jazasyz. Onlaın rejimde tirkelý úshin júıege kirip, elektrondy ótinimdi toltyrasyz. Al HQKO arqyly tirkelgińiz kelse, Connection Points bóliminiń qyzmetin qoldana alasyz.
Nurlybek Qabdyqaparovtyń aıtýynsha, tirkeler aldynda otbasylyq qyzmet kórsetý jáne medıtsınalyq-sanıtarlyq kómektiń qoljetimdiligi prıntsıpterin eskere otyryp, úıińizge jaqyn emhanany tańdaǵan jón. Bul prıntsıp naýqasqa dárigerdiń jedel kómek kórsetýine múmkindik beredi. Azamattardy emhanaǵa tirkeıtin mekemeler tizimi «ÁMSQ» KEAQ-nyń ınternet-resýrsynda kórsetilgen.
