Astanada 44 eldiń ókilderi memlekettik qyzmet trendterin talqylap jatyr
Bıylǵy jıyn «Turaqty damý maqsattaryndaǵy memlekettik qyzmetti jetildirý» taqyrybyna arnalyp otyr.
«Dástúr boıynsha, memlekettik qyzmetti damytýdyń ózekti máselelerin talqylaýǵa 44 memleketten ýákiletti organ basshylary men sarapshylar jınaldy. Jyl ótken saıyn qatarymyz tolyǵýda, áriptestiktiń sapasy da jańa deńgeıge kótirilýde. Aımaqtyq dep atalatyn hab shyn máninde jahandyq sıpatqa ıe boldy. Bul jetistikter Astana haby qyzmetiniń ózektiligin kórsetýmen qatar, bolashaq múmkindikterin de aıqyndap otyr. Búgingi pikir almasý bizdiń ortaq isimizge sony serpin beretinine senimdimin», - dedi Astana memlekettik qyzmet habynyń basqarýshy komıtet tóraǵasy Álıhan Baımenov konferentsııanyń ashylý saltanatynda.
Komıtet tóraǵasynyń aıtýynsha, sońǵy bes jylda astanalyq hab EYDU, Eýropalyq odaq, Amerıka memlekettik basqarý qoǵamy syndy túrli áriptestermen yntymaqtastyq kelisimin bekitken.
«Habqa qatysýshy elder arasynda eki myńnan astam memlekettik qyzmetshiniń biliktiligin arttyrý aıasynda 70-ten astam sharalar uıymdastyryldy. Memlekettik qyzmet usyný boıynsha keıster, sybaılas jemqorlyqpen kúres, memlekettik qyzmetshilerdi yntalandyrý jóninde 40-tan astam ǵylymı jarııalanymdar, saraptamalyq materıaldar jaryq kórdi», - dep túıindedi sózin Álıhan Baımenov.
Onyń aıtýynsha, búgin paneldik sessııadan bólek, hab alańynda alǵash ret memlekettik basqarý salasyndaǵy tanymal spıkerlerdiń qatysýymen memlekettik qyzmettegi ozyq tehnologııalar, oılaý júıesin ózgertý jáne múmkindikterdi keńeıtý taqyrybynda Hub Talks dáristeri uıymdastyrylady.
Sondaı-aq, Elektrondy úkimet praktıkteri alıansy memlekettik qyzmet salasyndaǵy ınnovatsııalarǵa arnalǵan tıimdi áriptestik qurý týraly semınar ótkizedi.
Aıta keteıik, Astana memlekettik qyzmet haby 2013 jyly memlekettik qyzmet salasyn damytýda tájirıbe men bilim almasý maqsatynda kópjaqty platforma retinde qurylǵan bolatyn. Habqa qatysýshy elder sany bes jylda 25-ten 40-qa deıin artty.
