Astanada 43-shi Dúnıejúzilik dástúrli mýzyka konferentsııasy (ICTM) ótedi
ASTANA. QazAqparat - Jýyrda Qazaq ulttyq óner ýnıversıtetinde dúnıe júzindegi eń iri mádenı sharalardyń biri - 43-shi Dúnıejúzilik dástúrli mýzyka konferentsııasy (ICTM) ótedi. Bul týraly QR Prezıdenti janyndaǵy Ortalyq kommýnıkatsııalar qyzmetinde ótken baspasóz máslıhatynda Qazaq ulttyq óner ýnıversıtetiniń rektory Aıman Musaqojaeva málim etti.
«Bıylǵy jyldyń 16-22 shildesi aralyǵynda Astanada Dúnıejúzilik dástúrli mýzyka konferentsııasy (ICTM) ótedi. Dástúrli mýzykaǵa arnalǵan bul konferentsııa osymen 43-shi ret ótkizilip otyr. Osydan eki jyl buryn Qytaıdaǵy Shanhaı qalasynda ótken konferentsııanyń basqarý komıteti kelesi konferentsııany Astanada ótkizý týraly sheshim qabyldaǵan bolatyn. Konferentsııa árbir eki jyl saıyn uıymdastyrylatynyn aıta ketý kerek, negizi onyń jumys istep kele jatqanyna bıyl 86 jyl tolyp otyr. Buǵan deıin atalǵan konferentsııa TMD elderiniń eshqaısysynda ótkizilmegen bolatyn. Bıyl konferentsııaǵa qatysý úshin 70 memleket ótinish bildirip, ol elderden 640-tan astam ǵalymdar men sarapshylar keledi, olar ulttyq óner salasyndaǵy máseleler jaıyn jan-jaqty talqylaıdy. Sondaı-aq atalǵan konferentsııa boıynsha materıaldar, jınaqtar, oqýlyqtar, maqalalar men jazbalar jaryq kóredi. Biz úshin bul qajet. Biz eń aldymen óz mádenıetimizdi meńgerýimiz kerek», - deıdi A.Musaqojaeva. Onyń aıtýynsha, Qazaqstan, AQSh, Reseı, Japonııa, Qytaı, Brazılııa, Túrkııa, Ońtústik Afrıka, Chehııa, Ulybrıtanııa, Kanada, Portýgalııa jáne basqa da álem elderinen kelgen ókilder bir apta boıy dástúrli ulttyq óner men mádenıetti meńgerý máselelerin talqylaıdy.
