Astanada 400 avtobýs tegin WI-FI júıesimen jabdyqtaldy
ASTANA. QazAqparat - Búgin Astanada qoǵamdyq avtobýstardy tegin ınternetpen jabdyqtaý boıynsha "WI-FI Bus Astana" jobasynyń tusaýy kesildi.
Atalǵan jobany Astana ákimdigi, "BEELINE" uıaly baılanys operatory, "Astana LRT" kompanııasy jáne "Astana Innovations" ınnovatsııalyq damý operatory qolǵa alyp otyr. Jalpy WI-FI Bus jobasy Qazaqstanda 2013 jyly bastalǵan bolatyn.
BEELINE Qazaqstan kompanııasynyń atqarýshy dırektory Taras Parhomenkonyń aıtýynsha, qazirgi ýaqytta WI-FI Bus jobasy 9 qalada júzege asyrylýda.
"Internettiń jyldamdyǵy sekýndyna 1,5-nan 10 megabıtti quraıdy. Búgin birneshe saǵattyń ishinde avtobýstardaǵy ınternetti 300 astam adam paıdalanǵan jáne 2,5 gb trafık júktedi", - deıdi ol.
"Astana LRT" kompanııasynyń basshysy Talǵat Ardannyń atap kórsetkenindeı, búginde 100 avtobýs ınternetpen jabdyqtalsa, tústen keıin olardyń sany 400-ge jetedi.
"Jaqyn bolashaqta barlyq avtobýstarda WI-FI modýlder ornatylady. Bıýdjetten eshbir tıyn bólingen emes", - dedi T. Ardan.
