Astanada 40 qylmystyq is taraptardyń til tabysýyna baılanysty toqtatyldy
ASTANA. QazAqparat - Astanada ishki ister departamentiniń tergeýshileri men anyqtaýshylarynyń «Medıatsııany damytý ortalyǵy» respýblıkalyq qoǵamdyq birlestiginiń ókilderimen jumys kezdesýi ótti, dep habarlaıdy QazAqparat Astana qalalyq Іshki ister departamentiniń baspasóz qyzmetine silteme jasap.
Jumys kezdesýi barysynda medıatsııany sotqa deıingi tergeý sharalaryna deıin keńinen paıdalaný máselesi sóz boldy. Óıtkeni ózara tatýlasý azamattardyń ózderi úshin de paıdaly, quqyq qorǵaný organdarynyń da jumysyn jeńildetedi.
«Medıatsııa sońǵy ýaqytta Qazaqstanda keńinen qoldanylýda. Osyǵan deıin Astana qalalyq Іshki ister departamenti men «Medıatsııany damytý ortalyǵy» RQB arasynda qylmystyq protsesster barysyndaǵy sotqa deıingi medıatsııany damytý baǵytynda yntymaqtastyq jónindegi memorandýmǵa qol qoıylǵan bolatyn. Osylaısha, jyl basynan beri medıatsııa tártibimen 40-qa jýyq kelisimder jasalyp, taraptardyń tatýlasýyna baılanysty qylmystyq ister toqtatyldy»,-dedi Astana qalalyq ІІD-niń tergeý basqarmasy bastyǵynyń orynbasary Talǵat Temirbolatov.
Qazaqstan aýmaǵynda birqatar medıatsııa ortalyqtary qurylǵan. Qazaqstannyń úkimettik emes uıymdary konfederatsııasynyń málimetteri boıynsha, respýblıkada «Kelissózder protsesin damytý, beıbit strategııalar men janjaldardy sheshý ortalyǵy» jumys isteıdi.
