Astanada 4 myńnan astam túlek úshin «sońǵy qońyraý» soǵyldy
ASTANA. QazAqparat - Elordada 11 synyp oqýshylary mekteppen qoshtasty, 4 myńnan astam túlek úshin búgin «sońǵy qońyraý» soǵyldy, dep habarlady qalalyq ákimdiktiń baspasóz qyzmeti.
Túlekterge arnalǵan merekelik shara barysynda mektep dırektorlary, muǵalimder, synyp jetekshileri, ata-analar sóz sóılep, óz tilekterin bildirdi. Astana qalasy ákiminiń orynbasary Ermek Amanshaev № 60 mektep-lıtseıdiń túlekterin quttyqtady.
- Bul sizder úshin qobaljý sáti, sizder eresek ómirge aıaq basqaly tursyzdar, aldaryńyzda úlken ómirlik jol tur. Ár adamnyń taǵdyry onyń ózine baılanysty. Sizder úshin barlyq jaǵdaılar jasaldy: mektepti bitirdińder, jaqsy bilim aldyńdar. Endi jańa mamandyqty ıgerip, ómirden óz oryndaryńdy tabýlaryńa tilektespin. Aq jol bolsyn! - dedi E. Amanshaev túlekterge qaratyp aıtqan sózinde.
№75 mektep-gımnazııada ótken saltanatty sharaǵa QR Bilim jáne ǵylym mınıstri Erlan Saǵadıev qatysty, al vıtse-mınıstr Elmıra Sýhanberdıeva №1 mektep-lıtseıdiń túlekterin quttyqtady.
Túlekter sońǵy mektep valsyn bılep, shara sońynda kókke kógershinder men túrli tústi sharlar ushyryldy.
- Bárimiz de qobaljyp turmyz. Mektepti úzdik bitirip, UBT-ǵa jaqsylap daıyndalyp jatyrmyz. Bári de 125 alsyn. Sáttilik tileımin, - dedi Amangeldına Janel.
Sonymen qatar, «Báıterek» monýmentiniń aldyndaǵy alańda dıskoteka, ınteraktıvti konkýrstar, fleshmob jáne t.b. qyzyqty oıyn-saýyqtar uıymdastyryldy. Bul kún túlekterdiń esinde máńgi saqtalyp qalady.
Elordalyq shyǵarmashylyq ujymdar men Oqýshylar saraıynyń úzdik ártisteri keremet mýzykalyq jáne bı nomerlerimen barshaǵa jaqsy kóńil-kúı syılady.
