Astanada 4 kúnde úsh myńǵa jýyq ákimshilik buzýshylyq tirkeldi
ASTANA. 20 qańtar. QazAqparat - Elordada «Astana joldaryndaǵy qaýipsizdik» aldyn alý is-sharasy aıasynda 2620 jýyq ákimshilik buzýshylyq anyqtaldy. Bul týraly astana.kz saıtyna qalalyq Іshki ister departamentinen habarlady.
«Astana joldaryndaǵy qaýipsizdik» aldyn alý is-sharasy barysynda polıtseıler 2620 astam ákimshilik buzýshylyq tirkedi, sonyń ishinde 27 kólikti mas kúıinde basqarý, 42 kólikti basqarý kezinde uıaly telefonmen sóılesý, 53 qaýipsizdik beldikterin taǵý erejelerin buzý faktileri», - delingen habarlamada.
Budan basqa, Jol qozǵalysy erejelerin buzǵan jaıaý júrginshilerge qatysty 94 hattama toltyryldy, jol qozǵalysyna qatysýshylardyń jolǵa qoqys tastaýynyń 59 faktisi tirkeldi. Sonymen qatar, qoǵamdyq oryndarda temeki shekkeni úshin 168 adam, alkogoldik ishimdikter ishken 718 jáne tynyshtyq buzǵan 279 quqyq buzýshy ustaldy.
Aıta keteıik, elordalyq ákimshilik polıtsııa qyzmetkerleri múddeli vedomstvolarmen birlesip mektepterde, mektepke deıingi mekemelerde jáne qalalyq avtobýs parkteriniń eńbek ujymdarynda jol qozǵalysy qaýipsizdigi máseleleri jóninde 102 dáris pen áńgimelesý uıymdastyrdy. Sondaı-aq, ákimshilik polıtsııa qyzmetkerleri 8 qylmysty ashty: eki tonaý, 3 urlyq pen densaýlyqqa zııan keltirý, esirtkini zańsyz saqtaý, qarýdy zańsyz saqtaý jáne alyp júrý faktileri. Eske salaıyq, «Astana joldaryndaǵy qaýipsizdik» aldyn alý is-sharasy 16-19 qańtarda ótkizildi. Іs-shara barysynda Ákimshilik polıtsııa basqarmasynyń jeke quramy kúsheıtilgen tártipte qyzmet etti. Maqsaty elorda kóshelerinde quqyqtyq tártip ornatý, joldardaǵy apattylyq jaǵdaıyn turaqtandyrý bolyp tabylady.
