Astanada 4 kásiporynda 22,2 mln teńge jalaqy tólenbegen
ASTANA. KAZINFORM — Elordada 4 kásiporynda qyzmetkerler aldynda 22,2 mln teńge jalaqy qaryzy bar. Bul týraly QR Eńbek jáne halyqty áleýmettik qorǵaý mınıstrliginiń Memlekettik eńbek ınspektsııasy komıtetiniń Astana qalasy boıynsha departamentiniń basshysy Erlan Ismaǵulov aıtty.
Onyń aıtýynsha, búginde Astanada 267 906 kásiporyn jumys isteıdi. Onda shamamen 738 myń adam eńbek etedi. Osyǵan baılanysty jalaqynyń ýaqytynda tólenýi men áleýmettik kepildikterdiń saqtalýyn baqylaý mańyzdy baǵyttardyń biri bolyp otyr.
— 2026 jylǵy 13 sáýirdegi jaǵdaı boıynsha 4 kásiporynda 64 qyzmetkerge 22,2 mln teńge jalaqy tólenbegeni anyqtaldy. Memlekettik eńbek ınspektorlary bul baǵytta turaqty jumys júrgizip keledi, — dedi Erlan Ismaǵulov.
Jalaqy qaryzy «Food Brands», «TSM.Metal», «Teplolıýks-AES» jáne «MDA Distribution» kompanııalarynda tirkelgen.
Onyń aıtýynsha, atalǵan kásiporyndardyń barlyǵy tekserilip, jumys berýshiler ákimshilik jaýapkershilikke tartylǵan. Olarǵa jalaqyny tolyq óteý týraly mindetti nusqamalar berilgen.
— Qaryzdy óndirip alý úshin materıaldar jeke sot oryndaýshylaryna joldandy. Sondaı-aq máseleniń qylmystyq mánin anyqtaý úshin qujattar Astana qalasynyń Polıtsııa departamentine jiberildi. Jalaqy qaryzy bar kásiporyndardy bankrot dep taný máselesi boıynsha Astana qalasynyń Memlekettik kirister departamentimen birlesken jumys júrgizilip jatyr, — dedi ol.
Aıta keteıik, elimizde jalaqy, alıment, zeınetaqy jáne járdemaqy túsetin shottardan tyıymdardy alyp tastaýǵa baǵyttalǵan arnaıy naýqan ótip jatyr.
