Astanada 4 balany qaqqan júrgizýshi aıyppul tólep qutylýy múmkin
ASTANA. QazAqparat - Astanada Imanov kóshesiniń boıynda kólik apatyn jasap, 4 balany qaǵyp ketken «Lexus» djıbiniń júrgizýshisi 1000 AEK kóleminde aıyppul tóleýi nemese 2 jyl bas bostandyǵynan aıyrý jazasyn alýy yqtımal. Bul týraly «QazAqparat» tilshisine Astana ІІD baspasóz qyzmeti habarlady.
Aıta keteıik, tórt balanyń biri óte aýyr halde aýrýhanaǵa túsken edi, apat saldarynan onyń kók baýyry men bir búıregin dárigerler alyp tastaýǵa májbúr bolǵan.
«Qazirgi ýaqytta Qylmystyq Kodekstiń 345-baby boıynsha sot aldyndaǵy tergeý áli jalǵasýda. Tıisti saraptamalar taǵaıyndaldy. Atalǵan babtyń sanktsııasynda aıyptyǵa 1000 AEK-ke deıin aıyppul salý nemese 2 jyl bas bostandyǵynan aıyrý jazasy qarastyrylǵan», - dedi ІІD-niń resmı ókili Sofıa Qylyshbekova.
Qazirgi ýaqytta júrgizýshiden eshqaıda shyqpaý týraly qolhat alynǵan.
Esterińizge sala keteıik, 7 qyrkúıekte Imanov pen Asan Qaıǵy kósheleriniń qıylysynda jol apatynan tórt bala zardap shekken bolatyn. Asan Qaıǵy kóshesimen kele jatqan «Lexus» avtokóliginiń 36 jastaǵy júrgizýshisi Imanov kóshesiniń qıylysynda «Mersedes» kóligine jol bermesten ótýge umtylyp, soqtyǵysqan bolatyn.
Kólik soqtyǵysynan «Lexus» júrgizýshisi rýldi buryp, kámeletke tolmaǵan jaıaý júrginshilerdi basyp, jol boıynda turǵan «Lada» kóligin de túıip ótken. Budan soń, «Lexus» kóligi soqqynyń qattylyǵynan «ZAZ» markaly kólikke qaraı aýdarylyp, ol bolsa serpinmen taǵy bir «Mıttsýbısı» markaly kólikti soqqan. Jol-kólik oqıǵasy saldarynan jaıaý júrginshi tórt bala zardap shekti. Atap aıtqanda, 2002, 2005 jáne 2007 jyldary týǵan tórt bala ártúrli dene jaraqatymen aýrýhanalarǵa jetkizildi.
