Astanada 4 balabaqshanyń salynbaýyna ınvestordyń ómirden ozýy sebep bolýy múmkin

NUR-SULTAN. QazAqparat – Elordada memlekettik-jekeshelik áriptestik jobasy aıasynda salynýy tıis 4 balabaqsha qurylysynyń bastalmaýyna polshalyq ınvestordyń ómirden ozýy sebep bolýy múmkin. Bul týraly Nur-Sultan qalalyq Bilim basqarmasy basshysynyń mindetin atqarýshy Dýlat Shoǵanbaı aıtty, dep habarlaıdy QazAqparat tilshisi.

«Bizde taǵy bir kúrdeli másele bar. Qalǵan 4 balabaqsha boıynsha halyqaralyq, Polshadan ınvestor bar. Biz qala basshylyǵynyń ruqsatymen Polshaǵa habarlasyp, kelisimshartqa qaraýymyz kerek. Nege? Sebebi 2 jyl ótti, ol jaqtan esh habar joq. Birde-bir kirpishi qalanbaǵan. Halyqaralyq ınvestor 240 oryndyq 4 nysan salý kerek bolatyn. 2017 jyldan beri úsh jyl ýaqyt ótti. Kelisimshart boıynsha 2019 jyly qurylysy bitip, paıdalanýǵa berilýi tıis bolatyn. Bizde ınvestor qaıtys boldy degen málimet bar. Ol sheteldik bolǵannan keıin esh habaryn ala almaı otyrmyz», - dedi ol elorda máslıhatynyń áleýmettik-mádenı damý máseleleri jónindegi turaqty komıssııasynyń otyrysynda.

Osy rette Nur-Sultan qalalyq máslıhatynyń hatshysy Erlan Kanalımov bul problemany sheshýdiń birneshe jolyn atady.

«Bizde, ákimdikte halyqaralyq bólim bar. «Atameken» ulttyq kásipkerlik palatasy bar. Olardyń kúshi jetpeı jatsa, Syrtqy ister mınıstrligin tartý kerek. Solar arqyly taǵy bir suranys jibereıik. Polshada Elshiligimiz de jumys isteıdi. Ómir, túsinemiz. Eger ınvestor qaıtys bolsa, jobany iske asyratyn izbasarlary qalmasa bul jobalardy basqa ınvestorlarǵa bereıik. Qolymyzda tur ǵoı»,- dedi ol.

Aıta keteıik, 2020 jyly elordada josparlanǵan 6 balabaqshanyń bireýi ǵana salyndy.