Astanada 38 «jasyryn» memlekettik qyzmet anyqtaldy

Bul týraly búgin Astana qalalyq Memlekettik qyzmet isteri jáne sybaılas jemqorlyqqa qarsy is-qımyl departamentiniń basshysy Tilegen Kaskın málim etti, dep habarlaıdy QazAqparat.

«Ult josparyn júzege asyrý maqsatynda departament jergilikti atqarýshy organdardyń barlyǵynyń jemqorlyq táýekelderine syrttaı saraptama júrgizdi. Nátıjesinde jemqorlyqtyń 303 táýekeli, onyń ishinde 38 «jasyryn» memlekettik qyzmet anyqtalyp, departament memlekettik organdardyń birinshi basshylaryna anyqtalǵan buzýshylyqtardy joıý boıynsha 176 usynys jiberdi», - dedi ol.

Máselen, onyń atap ótýinshe, departamenttiń usynysymen «Turǵyn úı qurylysyna úleskerlik qatysý týraly» QR Zańyna ózgertýler engizildi. Ol elimizdiń barlyq úlesker azamattarynyń quqyǵyn qorǵaýǵa septigin tıgizip, úleskerlik qurylysqa salynǵan qarjylaı aqshany joǵaltý táýekelin birshama tómendetti.

 «Astana qalasy boıynsha memlekettik qyzmet kórsetýlerge júrgizilgen saraptama 7,3 mıllıonnan astam memlekettik qyzmettiń kórsetilgenin anyqtady. Bul ótken jyldyń sáıkes kezeńimen salystyrǵanda 40 paıyzǵa artyq. Onyń ishinde Halyqqa qyzmet kórsetý ortalyqtary arqyly 1,3 mln, «elektrondyq úkimet» portaly arqyly 1,3 mln qyzmet kórsetilgen. Tolyqtaı alǵanda, memlekettik qyzmetter týraly zańnamanyń saqtalýyn baqylaýǵa iriktelgen 7 tekserý júrgizilip, 8804 fakti boıynsha 19 buzýshylyq anyqtaldy, 14 laýazymdy tulǵa jaýapkershilikke tartyldy», - dedi Kaskın.