Astanada 38 myńnan astam múmkindigi shekteýli azamat turady

ASTANA. KAZINFORM – Elordada Áıelder isteri jáne otbasylyq-demografııalyq saıasat jónindegi komıssııanyń otyrysy ótip, onda erekshe bilim berý qajettilikteri bar balalardy qoldaý, múmkindigi shekteýli jandardy áleýmettik beıimdeý jáne jastar arasyndaǵy qaýipsizdik máseleleri qaraldy, dep habarlaıdy elorda ákimdiginiń resmı saıty.

Qala ákiminiń orynbasary Eset Baıkenniń tóraǵalyǵymen ótken jıynǵa aýdan ákimderiniń orynbasarlary, basqarma basshylary, qoǵamdyq uıymdar men sarapshylar qatysty.

Qazirgi tańda Astanada 38 myńnan astam múmkindigi shekteýli azamat turady. Onyń ishinde 27 myńy – eresekter, al 10 myńnan astamy – balalar. 2025 jyly olarǵa qoldaý kórsetý maqsatynda 29 myńnan astam arnaıy qural-jabdyqtar men qyzmet túrleri usynylǵan.

Jyl basynan beri Mansap ortalyǵyna 535 jas jumysqa ornalasý úshin júgingen. Onyń ishinde 185-i áleýmettik qorǵaý sharalarymen qamtyldy. Nátıjesinde 7 jas turaqty jumysqa turdy, 122 jas qoǵamdyq jumystarǵa jiberildi, 37 jas «Bastaý Bıznes» baǵdarlamasy boıynsha oqýdy bastady, al 3 jas jańa bıznes-ıdeıaǵa grant ıegeri atandy.

Sońǵy jyldary ınvataksı parki úsh eseden asa ulǵaıyp, búginde 129 kólik qyzmet kórsetýde. Sonymen qatar qalada 11 áleýmettik mekeme jáne birqatar ÚEU múmkindigi shekteýli balalarǵa arnaıy áleýmettik qyzmetter usynyp otyr. 2025 jyly mundaı qyzmetpen 7 800-den astam adam qamtyldy.

Otyrysta kámeletke tolmaǵandar men jastar arasyndaǵy qaýipsizdik sharalary da qaraldy. Komıssııa músheleri balalardyń quqyqtaryn qorǵaý salasyndaǵy vedomstvoaralyq ózara is-qımyldy kúsheıtý qajettigin atap ótti.

– Jıyn qorytyndysy boıynsha halyqtyń osal toptaryn qoldaýǵa baǵyttalǵan qosymsha sharalar ázirleý jáne iske asyrý jóninde ýákiletti organdarǵa naqty tapsyrmalar berildi, – dedi komıssııa tóraǵasynyń orynbasary Nazgúl Maqjan.

Aıta keteıik, Qazaqstanda erekshe qajettiligi bar balalardy qoldaýǵa arnalǵan jańa zań ázirlenip jatyr.