Astanada 350 úlesker kópten kútken páterlerine qonystandy
ASTANA. KAZINFORM — Astanada bes jyldan astam ýaqyt boıy baspanalaryn kútken 350 úlesker páterleriniń kiltin aldy. «Atamarı» turǵyn úı kesheniniń qurylysy prokýratýranyń aralasýynan keıin aıaqtaldy.
2020 jyly azamattar bolashaq páterlerine qarajat salǵan. Alaıda qurylys salýshy ózine alǵan mindettemelerin ýaqytynda oryndamaı, turǵyn úı kesheniniń qurylysy aıaqtalmaǵan.
Úleskerlerdiń múddesin qorǵaý maqsatynda prokýratýra sotqa talap aryz engizdi. Nátıjesinde aıaqtalmaǵan qurylys nysany jańadan qurylǵan turǵyn úı-qurylys kooperatıvine berildi.
Keıin qurylys jumystary jalǵasyp, «Atamarı» turǵyn úı kesheni paıdalanýǵa berildi. Osylaısha, 350 úlesker kópten kútken baspanalaryna qol jetkizdi.
Prokýratýranyń málimetinshe, jyl basynan beri sottar úleskerlerdiń quqyqtaryn qorǵaýǵa qatysty prokýrorlardyń 11 talap-aryzyn qanaǵattandyrǵan.
— Sonyń nátıjesinde jalpy somasy 3,9 mlrd teńge bolatyn talaptar boıynsha 277 úleskerdiń múddesi qorǵaldy. Úlestik qurylys salasyndaǵy zańdylyqtyń saqtalýy prokýratýra organdarynyń turaqty baqylaýynda, — delingen habarlamada.
Astana qalasynyń prokýratýrasy azamattarǵa turǵyn úı kesheninen páter satyp almas buryn qurylys salýshynyń tıisti ruqsat qujattarynyń bar-joǵyn tekserýge keńes beredi. Turǵyn úı keshenderiniń zańdylyǵyn homeportal.kz saıtyndaǵy tizimnen tekserýge bolady.
Buǵan deıin Jetisýda úlesker qarjysyn zańsyz tartqan qurylysshylar jaýapqa tartylǵanyn jazǵanbyz.
