Astanada 35 fototirkeý apparattyq kesheni ornatyldy
ASTANA. QazAqparat - Astana qalasynyń ákimdigi qala turǵyndary men qonaqtarynyń qaýipsizdigin qamtamasyz etý úshin «Tirshilikti keshendi qamtamasyz etý júıesi» jobasyn júzege asyryp keledi, dep habarlady astana.kz.
Astana qalasy ІІD Ákimshilik polıtsııa basqarmasynyń habarlaýynsha, bıyl tájirıbe retinde «Astana Innoveıshn» AQ testilik tártibinde qalanyń qozǵalysy qarqyndy kóshelerde «Vokord» kompanııasynyń 35 apparattyq kesheni (budan ári - APK), sonyń ishinde 25 «Vokord-Tsıklop» jáne 10 «Vokord-Traffık» ornatyldy. «Vokord-Traffık» - bul tolyq fýnktsııaly jol qozǵalysyn baqylaý júıesi, avtokólik nómirlerin tanýdan bólek, kelesi jol qozǵalysy erejeleriniń buzylýyn avtomatty rejımde tirkeıdi: 1. Jyldamdyqty arttyrý; 2. Joldaǵy ortasha jyldamdyqty arttyrý; 3. Jol qıylysyndaǵy tártip buzýshylyq: baǵdarshamnyń qyzyl jaryǵyna joldy kesip ótý, toqtaý syzyǵynan asyp ketý, tyıym salynǵan jerlerde burylý, baǵdarshamnyń qosymsha sektsııasy janyp turǵanda burylý; 4. Jalpaq tutas syzyqty kesip ótý; 5. Joldyń qarsy baǵytyna shyǵý; 6. Ruqsat etilmegen jerde turý jáne toqtaý; 7. Temirjol ótpelerinen ótkende ereje buzý; 8. Basqarylmaıtyn jaıaý júrginshiler jolynda jaıaý júrginshige jol bermeý; 9. Qoǵamdyq kólikke belgilengen syzyqpen júrý jáne t.b.. Jol qozǵalysy erejelerin buzýdy tirkeıtin baǵdarlamalyq-apparattyq keshen VOCORD Net Cam4 joǵary sheshimdi kameralarymen, radarlarmen, ımpýlsıvti IK-projetorlarymen, krostaý qurylǵylarymen, kóshe serverleri men baǵdarlamalyq qamtýmen jabdyqtalǵan. Avtokólik nómirlerin anyqtaıtyn fototirkeý kameralarynan bólek, jol qıylystarynda baǵdarshamdarǵa baǵyttalǵan sholýshy beınebaqylaýlar ornatylady. Baǵdarshamnyń qyzyl túsi shamy janǵanda toqtaý syzyǵynan asyp qıylysqa ótken avtokólik ereje buzý bolyp tabylady. Sholýshy beınebaqylaý kameralary túsirgen sýretter qosymsha dálel retinde paıdalanylady. Polıtsııa qyzmetkerleriniń aıtýynsha, búginde atalǵan keshender testilik tártipte qoldanylýda. Olardyń jumysynyń nátıjesine baılanysty apparatýrany iske qosý máselesi sheshiletin bolady.
