Astanada 336 mlrd teńgege 140 óndiris iske asyp, óńdeý ónerkásibi jańa qarqyn aldy
ASTANA. KAZINFORM — Búginde Astananyń № 1 ındýstrııalyq parkinde jalpy quny 336 mlrd teńgege baǵalanǵan 140 joba ornalastyrylǵan. Onyń 82-si jumys istep tur, 58 joba qurylys nemese iske asyrý satysynda.
Elordada ındýstrııalyq ınfraqurylymdy damytý jumysy jalǵasyp, óńdeý ónerkásibiniń kórsetkishteri aıtarlyqtaı jaqsardy. Memlekettik saıasat nátıjesinde 2024 jyly sektor ósimi 10%-dan asyp, óndiris kólemi 2,5 trln teńgege jetti. 2025 jyly jańa óndiristik qýattardyń iske qosylýy esebinen ósimniń 7% deńgeıinde saqtalýy kútiledi.
— Sońǵy úsh jylda eńbek ónimdiligi eki esege artyp, tehnologııa arqyly 37 joba salynyp, 10 myńnan astam páter paıdalanýǵa berilgen. Kásiporyn janynan ashylǵan oqytý alańynda daıarlanǵan 40 adamnyń 63%-y jumysqa ornalasqan, — dedi qaýipsizdik ınjeneri Indıra Tohmoldına.
Indýstrııalyq park aýmaǵynda medıtsınalyq buıymdar men kópsalaly óndirister de damyp keledi. Keshen basshysy Mýrat Chetınniń aıtýynsha, kásiporyn aıyna 500 medıtsınalyq kereýet shyǵarýǵa qaýqarly, al protsesterdiń basym bóligi robottandyrylǵan júıeler arqyly avtomattandyrylǵan.
— Buryn shetelden ákelinetin medıtsınalyq gaz júıeleriniń keıbir bólikteri endi Qazaqstanda daıyndalady. Táýligine júzdegen bólshek shyǵaratyn avtomattandyrylǵan hromdaý júıesi iske qosylǵan, — dep tolyqtyrdy óndiristi josparlaý menedjeri Saltanat Ispır.
Qurylys materıaldary óndirisi de qarqyn alyp jatyr. Injener Dmıtrıı Lebedev óndiristik jeliniń qýaty bir aýysymda 3,5–4 myń sharshy metr ónim shyǵarýǵa jetetinin, al jyldyq kólemniń 1,8 mln sharshy metrge deıin ulǵaıǵanyn aıtady. Jabdyqtar zamanaýı tehnologııalarmen jabdyqtalyp, metall betiniń adgezııasyn kúsheıtetin arnaıy júıeler engizilgen. Shıkizattyń barlyǵy — otandyq óndirýshilerden alynatyn metall, mıneraldy vata jáne ekikomponentti jelim.
Budan bólek, elordada ındýstrııalyq ınfraqurylymdy keńeıtý maqsatynda № 2 ındýstrııalyq parktiń qurylysy bastalǵany habarlandy.
Jańa alańda 500 mlrd teńgeden asatyn 100-den astam joba iske asyrylyp, 7 myńnan astam jumys orny ashylady dep josparlanyp otyr. Sonymen birge «Astana-Tehnopolıs» arnaıy ekonomıkalyq aımaǵynda Logıstıkalyq park qalyptastyrý jumystary júrgizilip jatyr. Qazirgi tańda kólik-logıstıkalyq ortalyqtardy salýǵa qyzyǵýshylyq tanytqan otandyq jáne sheteldik ınvestorlar pýly quryldy.
Astana qalasynyń Investıtsııalar jáne kásipkerlikti damytý basqarmasynyń málimetine sáıkes, elorda ekonomıkasyna tartylatyn ınvestıtsııa kólemi de artyp keletinin atap ótti. 2024 jyldyń toǵyz aıynda Astana ınvestıtsııa tartý boıynsha elde kósh bastap, 1,7 trln teńge tartty, bul ótken jylǵa qaraǵanda 37% ósimdi kórsetedi. Onyń ishinde 1,1 trln teńge — jeke ınvestıtsııalar, bul kórsetkish 22%-ǵa artqan. Investıtsııa aǵyny jyljymaıtyn múlik, kólik, ónerkásip, qarjy, bilim berý jáne saqtandyrý salalaryna baǵyttalǵan. Ulttyq jobalar pýlyndaǵy 127 joba jalpy 2,2 trln teńgeni quraıdy.
— Astanada eki ekonomıkalyq aımaq bar. Birinshisi — «Astana Jańa qala», ekinshisi — «Astana Tehnopolıs». Árqaısysynyń óndiristik jáne áleýmettik baǵyttary aıqyn. Birinshi aýmaqta iri zaýyttar shoǵyrlanǵan. Jobalardyń basym bóligi TMD elderine eksportqa kózdeldi. Elordada ınvestor tartý boıynsha aýqymdy jumys júrgizilip jatyr. Basty nazar ınvestıtsııalyq jaǵdaıdy jaqsartýǵa jáne jobalardy tolyq súıemeldeýge baǵyttalǵan, — dedi ındýstrııalyq aımaqtardy ákimshilendirý departamentiniń dırektory Almat Álimbaı.
Budan buryn Qazaqstan ekonomıkanyń naqty sektoryn damytýǵa baǵyttalǵan «Investıtsııaǵa tapsyrys» aýqymdy memlekettik baǵdarlamany iske qosqanyn jazǵanbyz.
Kámılá Múlik