Astanada 32 problemalyq turǵyn úıdiń qurylysy aıaqtaldy
ASTANA. KAZINFORM — Elordada úlestik qurylysqa qatysýshylardyń quqyqtaryn qorǵaý baǵytynda júrgizilgen jumystardyń nátıjesinde 32 problemalyq turǵyn úıdiń qurylysy aıaqtaldy. 16 myńnan astam úlesker baspanaly boldy. Bul týraly Qalalyq kommýnıkatsııalar qyzmetinde ótken brıfıngte qala prokýrorynyń kómekshisi Azamat Qazbekov málim etti.
Onyń aıtýynsha, úleskerlerdiń quqyqtaryn qorǵaý — atqarylyp jatqan jumystardyń negizgi baǵyttarynyń biri.
— Úleskerler qurǵan turǵyn úı-qurylys kooperatıvteri bul máseleni sheshýdiń tıimdi tetigine aınaldy. Nátıjesinde 32 problemalyq nysannyń qurylysy aıaqtaldy, 16 myńnan astam úlesker páterlerine qol jetkizdi. Táýekel tobyndaǵy nysandar sany 26-dan 20-ǵa deıin azaıdy. Prokýratýranyń bastamasymen sottar 9 talap-aryzdy qanaǵattandyrdy. Sonyń negizinde jer ýchaskelerin, aıaqtalmaǵan qurylys nysandaryn jáne olarǵa qatysty qujattardy turǵyn úı-qurylys kooperatıvteriniń menshigine berý týraly sheshimder qabyldandy, — dedi ol.
Sonymen birge qala ákimdigimen birlesip, qurylysy toqtap turǵan nysandardy aıaqtaý úshin jańa ınvestorlardy tartý jumystary jalǵasyp jatyr.
Aıta keteıik, buǵan deıin elordada quny 2 mlrd teńgeden asatyn ınjenerlik jeliler memleketke qaıtarylǵany týraly habarlanǵan bolatyn.
