Astanada 31 qazan kúni Aqmola oblysynyń aýyl sharýashylyǵy jármeńkesi ótedi
ASTANA. KAZINFORM — Astanadaǵy «Qazanat» ıppodromynda 31 qazan kúni Aqmola oblysynyń aýyl sharýashylyǵy jármeńkesi ótedi. Іs-shara bir kúnge josparlanyp otyr, dep jazdy elorda ákimdiginiń resmı saıty.
Jármeńkege Aqmola oblysynyń 20 aýdanynan taýar óndirýshiler qatysyp, jalpy kólemi 497,21 tonna bolatyn ózderi óndirgen aýyl sharýashylyǵy jáne azyq-túlik ónimderin usynady. Onyń ishinde:
* et ónimderi – 154 tonna;
* sút ónimderi – 31,75 tonna;
* kókónis ónimderi – 227 tonna;
* shujyq ónimderi men etten jasalǵan jartylaı fabrıkattar – 23 tonna;
* basqa da bakaleıa taýarlary – 62 tonna;
* taýyq jumyrtqasy – 150 myń dana.
Jármeńkeniń maqsaty – elorda turǵyndaryn arzan baǵada sapaly aýyl sharýashylyǵy jáne azyq-túlik ónimderimen qamtamasyz etý, otandyq óndirýshilerdi qoldaý, sondaı-aq ónimdi óndirýshiden tutynýshyǵa tikeleı jetkizý júıesin damytý.
31 qazan kúngi jármeńke elordada bıyl ótetin sońǵy aýyl sharýashylyǵy jármeńkesi bolmaq.
Іs-shara «Qazanat» ıppodromynda, Qarqaraly tasjoly, 1 mekenjaıynda ótedi.
Buǵan deıin Astanada Qaraǵandy jáne Qostanaı oblystarynyń sharýalary qatysqan aýyl sharýashylyǵy jármeńkesi ótken bolatyn.
