Astanada 31 eski turǵyn úı buzylady
ASTANA. QazAqparat - 2017 jylǵa deıin Astanada buzylýǵa jatatyn turǵyn úıler tizimine 1940 jyldan 1970 jylǵa deıin salynǵan 228 úı kirdi. Ol úılerdiń negizgi qurylys konstrýktsııalary men ınjenerlik jelileri ábden tozǵandyqtan apatty jaǵdaıda dep sanalady, dep habarlady astana.kz.
Astana qalasy Turǵyn úı ınspektsııasy basqarmasynyń málimetterine súıensek, bıyl 31 úı, jalpy aýdany 17,5 myń sharshy metr 463 páter buzylady. Onyń 19-y «Saryarqa» aýdanynda ornalassa, 12 úı «Almaty» aýdanynda. Apatty jaǵdaıdaǵy úılerdiń turǵyndaryna buzylatyn páterdiń sharshy metrine para-par jańa turǵyn úı beriledi. Estke sala keteıik, Astanadaǵy apatty úılerdi buzý boıynsha joba «Qoljetimdi turǵyn úı - 2020» baǵdarlamasy aıasynda júzege asyrylyp otyr. Jospar boıynsha 2017 jylǵa deıin buzylatyn 228 apatty jaǵdaıdaǵy úıdiń ornyna jańa turǵyn úı keshenderi men basqa da nysandar salynady. 3519 otbasy jańa páterge kóshiriledi.
