Astanada 306 ret jol erejesin buzǵan júrgizýshi qamaýǵa alyndy
ASTANA. KAZINFORM — Astanada jol qozǵalysy erejesin júıeli túrde buzǵan 25 jastaǵy júrgizýshi 10 táýlikke ákimshilik qamaqqa alyndy. Ol jyl basynan beri jol erejesin 306 ret buzǵan.
Astana prokýratýrasy málimetinshe, monıtorıng barysynda Hyundai Palisade kóliginiń júrgizýshisi anyqtalǵan. Onyń 169 quqyq buzýshylyǵy belgilengen jyldamdyqty asyrýǵa, taǵy 134-i avtobýs jolaǵymen júrýge qatysty bolǵan.
Mysaly, 3 mamyrda beınebaqylaý kameralary júrgizýshiniń Uly Dala dańǵylynda kólikti saǵatyna 137 shaqyrym jyldamdyqpen júrgizgenin tirkegen.
Prokýratýra júrgizýshiniń áreketterin júıeli ári qoǵamǵa qaýipti dep baǵalaǵan. Sot onyń áreketin usaq buzaqylyq retinde qarap, 10 táýlikke ákimshilik qamaqqa alý týraly sheshim shyǵarǵan.
Prokýratýranyń habarlaýynsha, mundaı sharalar polıtsııamen birlesip, jol qozǵalysy erejesin óreskel buzatyn júrgizýshilerdiń áreketin toqtatýǵa baǵyttalǵan.
Eske salaıyq, buǵan deıin Almaty turǵyndary bir táýlikte 1 500-den astam ret jol erejesin buzǵanyn habarlaǵanbyz.
