Astanada 300 myńǵa jýyq páterge elektr shyǵynyn ózdiginen joldaıtyn eseptegish ornatylady
ASTANA. KAZINFORM – Astana qalalyq tabıǵı monopolııalardy retteý departamenti basshysy Jandos Salımov elordanyń kópqabatty úılerine elektr tutyný kórsetkishterin avtomatty túrde joldaıtyn aspaptar ornatylatynyn aıtty.
- «Astana REK» aktsıonerlik qoǵamy 2027-29 jyldary kópqabatty úılerdi elektr energııasyn kommertsııalyq esepke alýdyń avtomattandyrylǵan júıesine qosýdyń jobasyn josparlap otyr. Ol jobanyń aıasynda kópqabatty turǵyn úılerge 299 466 avtomatty esepteý aspabyn ornatý kózdelgen. Jobanyń quny – 39, 8 mlrd teńge. Bul jobanyń qujattary da elektrondy platformada tekserýden ótip jatyr, - dedi ol óńirlik kommýnıkatsııalar qyzmetinde ótken baspasóz máslıhatynda.
Aıta ketý kerek, bul aspaptar páter ıelerin elektr eseptegish kórsetkishterin aı saıyn qolmen tapsyrýdan tolyq bosatady. Júıe tutynylǵan elektr kólemin avtomatty túrde qyzmet kórsetýshi uıymǵa jiberedi, tólem naqty tutyný boıynsha esepteledi. Bul qate esepteý men daýly jaǵdaılardy azaıtady, elektr tutynýyn baqylaýǵa múmkindik beredi.
Sondaı-aq, ol «Astana sý arnasy» kompanııasy aldaǵy 3 jylda 12,2 shaqyrym sý qubyry men káriz jelisin tartatynyn aıtty.
- «Energetıkalyq jáne kommýnaldyq sektorlardy jańǵyrtý» ulttyq jobasy aıasynda «Astana sý arnasy» memlekettik kommýnaldyq kásiporny 2026-2029 jyldary birneshe jobany iske asyrýdy josparlap otyr. Onyń ishinde 8,3 mlrd teńgege jalpy uzyndyǵy 12,2 shaqyrym bolatyn sý qubyry men káriz jelisin tartyp, kúrdeli jóndeý jobasy bar. Búgingi tańda «Astana sý arnasy» H. Dosmuhameduly kóshesiniń boıyndaǵy sý qubyry jelisin Aqjol kóshesimen qıylysqan tusynan bastap Alash kóshesine deıingi bóligin kúrdeli jóndeý týraly ótinim berdi. Bul – tehnıkalyq sý qubyry. Elektrondy platformada ótinim qujattary tekserilip jatyr, - dedi Jandos Salımov.
Buǵan deıin Astanadaǵy 13 kommýnaldyq kompanııa 156,6 mln teńgeni negizsiz tapqanyn jazǵan edik.