Astanada 300-ge jýyq jas sportshy buqaralyq júgirýge qatysty
ASTANA. KAZINFORM — Astanadaǵy Atatúrik saıabaǵynda «Esirtkisiz elorda — deni saý urpaq» atty keń aýqymdy sporttyq-profılaktıkalyq is-shara ótti, dep habarlaıdy qala ákimdiginiń resmı saıty.
Astana qalasynyń Baıqońyr aýdany ákimdigi men qalalyq Polıtsııa departamentiniń Esirtki qylmysyna qarsy is-qımyl basqarmasy, elorda boıynsha Kıokýshınkaı-kan karate federatsııasy, sondaı-aq «Astana jastary» jastar resýrstyq ortalyǵy uıymdastyrǵan is-sharanyń maqsaty — jastar arasynda salaýatty ómir saltyn nasıhattaý jáne nashaqorlyqtyń aldyn alý.
2026-2028 jyldarǵa arnalǵan «Astana — esirtkisiz qala» is-sharalar jospary aıasynda ótken is-shara 300-ge jýyq jas sportshy qatysyp, birneshe shaqyrymdyq júgirý qashyqtyǵyn eńserdi. Sonymen qatar jas karateshiler kópshilikke arnalǵan kórsetilimin usynyp, óz sheberlikterin pash etti. Onyń ishinde taqtaı syndyrý, arnaıy jattyǵýlar men jekpe-jek elementteri bar.
— Bizdiń basty maqsatymyz — balalar men jastardy salaýatty ómir saltyna baýlý. Qazir oqýshylardyń jazǵy demalysy bastaldy. Sondyqtan olardyń bos ýaqytyn paıdaly ótkizýine jaǵdaı jasaýymyz kerek. Biz memlekettik organdar men úkimettik emes uıymdardyń kúshin biriktirip, osyndaı is-sharalar arqyly jastardy sportqa tartýdy kózdeımiz. Nashaqorlyq pen zańsyz esirtki aınalymy búgingi qoǵamdaǵy ózekti máseleniń biri bolyp otyr. Memleket basshysy da ártúrli jıynda osy máselege erekshe nazar aýdarady. Árıne, polıtsııa qylmyskerlerdi anyqtap, jaýapkershilikke tartady. Biraq profılaktıka — bul kúrestegi eń mańyzdy baǵyttyń biri, — dedi Astana qalasy Polıtsııa departamenti Esirtki qylmysyna qarsy is-qımyl basqarmasynyń bólim bastyǵy, polıtsııa podpolkovnıgi Álııa Qıbatqyzy.
Onyń aıtýynsha, 26 mamyr men 26 maýsym aralyǵynda Astana qalasynda Halyqaralyq nashaqorlyqqa qarsy kúres kúnine oraı arnaıy aılyq ótkizilip jatyr.
Іs-shara barysynda nashaqorlyqtyń aldyn alý jónindegi keńes músheleri de jastarǵa úndeý jasady. Keńes múshesi, sport sheberi Erbol Talǵatuly sporttyń jastar ómirindegi mańyzyna toqtaldy.
— Men — sporttyq gımnastıkadan halyqaralyq dárejedegi sport sheberimin. Sport — jastardyń jarqyn bolashaǵyna bastaıtyn jol. Sportpen aınalysqan adam tártipke úırenedi, maqsat qoıa biledi, óz densaýlyǵyna jaýapkershilikpen qaraıdy. Sondyqtan jastardyń sportpen kóbirek aınalysqany óte mańyzdy, — dedi ol.
Al Astana qalasy boıynsha Kıokýshınkaı-kan karate federatsııasynyń tóraǵasy Aırat Jeńis mundaı bastamalardyń jastar tárbıesindegi róline toqtaldy.
— Búgingi is-sharaǵa federatsııamyzdyń 300-ge jýyq sportshysy qatysty. Olardyń eń kishisi — segiz jasta. Bizdiń sport túriniń negizinde tártip jatyr. Sondyqtan biz «Zań men tártip» qaǵıdatyn ustanamyz. Zalǵa kelgen ár balany aldymen tártipke úıretemiz. Sebebi tártipsiz sportshy erteń qoǵam úshin qaýip týdyrýy múmkin. Sondyqtan jattyǵýdyń alǵashqy kúninen bastap balalarǵa jaýapkershilik pen ózin-ózi baqylaýdy úıretemiz, — dedi federatsııa tóraǵasy.
Osyǵan deıin 80 jastaǵy astanalyq marafonshy jaraqatyna qaramastan Keıptaýnda márege jetkenin jazdyq.
