Astanada 30 myńnan astam «aqyldy» shamdar ornatylady
Kósheni jaryqtandyrý jekeniń qolyna ótpek. Osyǵan oraı, qala ákimdigi Otyn-energetıkalyq kesheni jáne kommýnaldyq sharýashylyq basqarmasy arqyly kósheni «aqyldy» jaryqtandyrýmen qamtamasyz etý úshin memlekettik-jekeshelik áriptestik arqyly konkýrs jarııalaıdy.
Otyn-energetıkalyq kesheni jáne kommýnaldyq sharýashylyq basqarmasynyń otyn-energetıkalyq resýrs bóliminiń basshysy Maqsat Esmaǵulovtyń aıtýynsha, qazirgi tańda qala kóshelerin túrli tıptegi biryńǵaı standarty joq shamdar jaryqtandyrýda.
«Keıbir jerlerge energııa únemdeıtini ornatylǵan, keıbir jerlerde eski tıptegisi ornatylǵan, al qazir barlyq jerge birdeı etip jaryqtandyrý ornatý qajet. Ol úshin aýdan ákimdikteriniń birliginde turǵan 30 myńnan astam eski shamdardy aýystyrý josparlanyp otyr», - dep túsindirdi ol.
Onyń aıtýynsha, olar tek energııa ǵana únemdep qoımaıdy, eń bastysy «aqyldy» shamdar.
«Shamnyń avtomatty rejimde janyp, sónip turýyna basymdyq beretin júıe ornatylady. Osylaı janyp-óship turatynyn retteıtin arnaıy jaryq datchıgi bolady. Sondaı-aq dıspetchrlik pýnkt te qurylady, olar avtomatty rejimde qaı ýchaskede sham sónip qaldy, qaı jerde apat boldy, qaı jerde jaryq joq, sham qaıda kúıip ketti, sonyń bárin dıspetcherlik pýnktte baqylap turýǵa bolady», - dedi M. Esmaǵulov.
Qazirgi tańda MJÁ-jobasynyń konkýrstyq qujatyn ázirleý aıaqtaldy. Konkýrs búgin jarııalanady dep kózdelgen. Oǵan biliktilik talaptaryna jaýap bere alatyn barlyq áleýetti qatysýshylar jberiledi. Konkýrstyń qujattyq kóshirme paketterin qalalyq «AstanaInvest» ınvestıtsııalardy damytý ortalyǵynan konkýrstyń ótetinin jarııalaǵannan kúnnen bastap tegin alýǵa bolady. Ótinishterdi qabyldaý 31 shildege deıin jalǵasady.
Konkýrstyń jeńimpazymen kelisimshartqa qol qoıýdy qyrkúıektiń sońyna taman josparlap otyr. Osydan keıin jekemenshik áriptes qýat kózin únemdeıtin shamdardy ornatýǵa kirisýi tıis.
