Astanada 30 kıiz úıden quralǵan «Etnoaýyl» ashylady

ASTANA. QazAqparat - 1 maýsym kúni Astananyń 20 jyldyǵyna arnaıy qurylǵan «Etnoaýyl» ulttyq-mádenı kesheniniń ekinshi maýsymy ashylady jáne ol jazdyń sońyna deıin jumysyn jalǵastyrady, dep habarlaıdy QazAqparat tilshisi.

QR Mádenıet jáne sport mınıstrliginen habarlaǵandaı, aýqymdy oqıǵa qazaq mádenıeti men tarıhynyń kóp ǵasyrlyq jaýharyn jınaqtaǵan. Etnoaýyldy óz salasyndaǵy aıryqsha jáne alǵashqy ulttyq joba dep maqtanyshpen aıtýǵa bolady. Keshenniń qaqpasyna kire bergennen qonaqtardy batyr kóshpendilerdiń, sheksiz sar dalany baǵyndyrýshylardyń ejelgi zamanyna qas qaǵym sátte alyp barady. Astananyń mereıtoıyn atap ótýge kelgen ár adam ózi úshin qyzyqty jáne este qalarlyq oqıǵany kórýine múmkindik alady.

Etnaýyl aıasynda etnıkalyq mýzyka jáne teatr óneriniń festıvalderi, kórmeler, qoldanbaly-sándik óneriniń ártúrli sheberlik synyptary, ulttyq sport túrleri boıynsha saıystar, atty-sporttyq is-sharalar ótedi.

2,5 myń sharshy metr alańyna jaıylǵan aımaq «Sheberler aýyly», «Sporttyq-tsırktik is-sharalar», «Kontserttik zal», «Demalys alleıasy», «Dástúrli qazaq jáne shyǵys taǵamdary meıramhanasy», «Ulttyq dástúrler men salttar», «Jibek joly» Shyǵys bazary jáne «Ańshylyqtyń dástúrli túrleri» sekildi kóptegen sektorlarǵa bólingen.

Etnaýyl aıasyndaǵy eń aýqymdy oqıǵa Qazaqstan Respýblıkasy Mádenıet jáne sport mınıstrliginiń uıymdastyrýymen «Alpamystyń jarqyn jebesi» atty teatrlandyrylǵan tsırktik shoýy bolady.

Qoıylymǵa ár elden kelgen 70 artıst qatysady. Olar: halyqaralyq tsırktik konkýrstarynyń laýreattary jáne eń joǵary deńgeıdegi sporttyq saıystardyń jeńimpazdary, Du Soleil tsırkiniń kóp jyldar boıy qatysýshylary.

«Etnoaýyl» Astana qalasynan 14 shaqyrym jerdegi «Qazanat» atshabarynyń aýmaǵynda ornalasqan.