Astanada 30 aýyl eńbekkeri «Ult dańqy» tósbelgisimen marapattaldy
"Búgin biz aýyl sharýashylyǵynda kóp jyldar boıy eńbek etken 30 eńbekkerge "Ult dańqy" tósbelgilerin tabystaýdamyz. Bul - eń alǵashqy saltanatty shara. Bizdiń uıym osylaısha aýyldyń betke ustarlaryn marapattaǵysy keldi. Búgin olar elordada eldiń saıası, qoǵamdyq jáne sport qaıratkerlerimen kezdesip, óz jerlerine úlken áser alyp qaıtady. Marapattalǵandardyń qatarynda negizinen fermerlik sharýashylyqtardyń basshylary bar. Sebebi aýylda birden bir jumys berýshiler solar. Olar elimizdiń "Bıznestiń jol kartasy-2020", "Jumyspen qamtý-2020" baǵdarlamalarynyń qatysýshylary", - dedi "Áleýmettik qoldaý jáne yntalandyrý ortalyǵy" qoǵamdyq uıymynyń ókili Dmıtrıı Dvoınev.
"Ózimniń ómir tarıhym aýyl sharýashylyǵynan bastalǵan. Búgingi tańda "QazTranGaz Aımaq" Túlkibas aýdandyq gaz sharýashylyǵyn alǵashqy qurylǵanynan bastap basqaryp kele jatqanyma bıyl 11 jyl boldy. Endi osy 11 jyldaǵy úlken eńbektiń arqasy búgingi tańda Ońtústik Qazaqstan oblysy Túlkibas aýdanyndaǵy barlyq eldi mekenderin 100 paıyz kógildir gazben qamtamasyz ettik. Ol kezderi 350 úı gazdandyrylǵan bolsa, 2002 jyldan beri 58 eldi mekende 17 myńnan astam úıge gaz júrgizildi. "Ult dańqy" ordenimen marapattalýym jigerime jiger qosady, budan da úlken eńbekke qol jetkizsem dep oılaımyn", - deıdi marapattalýshylardyń biri, «QazTranGaz Aımaq» kompanııasynyń Túlkibas fılıalynyń bastyǵy, Túlkibas aýdandyq máslıhatynyń jáne Ońtústik Qazaqstan oblystyq máslıhatynyń depýtaty Kelesbek Jartybaev.
