3-JEO men eki gaz jylý stantsııasy iske qosyldy – Jeńis Qasymbek

Astanada JEO-3-tiń birinshi kezeginiń jáne eki gaz jylý stantsııasynyń qurylysy aıaqtaldy. Elorda ákimi Jeńis Qasymbek qalanyń alǵash ret jylytý kezeńine úlken profıtsıtpen kirgenin aıtyp otyr, dep habarlaıdy Kazinform.

«Injenerlik ınfraqurylym boıynsha jańa aýdandardy jetkilikti jylý qýatymen qamtamasyz etý úshin 3-shi jylý elektr stantsııasynyń birinshi kezeginiń, Turan jáne Ońtústik-shyǵys gaz jylý stantsııalarynyń qurylysy aıaqtaldy. Bul – qosymsha 1130 gkal jylý qýatyn qamtamasyz etti. Mysaly, bir apta buryn -32-33 gradýs aıaz bolǵanda qala shamamen 3 myń gkal jylý paıdalandy, bizde rezervte shamamen 600-700 gkal qaldy», - dedi ákim búgin Ortalyq kommýnıkatsııalar qyzmetinde ótken baspasóz máslıhatynda.

Qala basshysy sońǵy jyldary alǵash ret jylytý kezeńine úlken profıtsıtpen kirgenin atap ótti.

«Kelesi jyly birinshi kezekte Telman gaz jylý stantsııasyn, ekinshi kezekte Turandy paıdalanýǵa berýdi josparlap otyrmyz. Bul bizge qosymsha shamamen 800 gkal jylý beredi. Jylytý nysandaryn ári qaraı salý, JEO qýatyn keńeıtý jumystary jalǵasady», - dedi spıker.

Aıta keteıik, Jeńis Qasymbek Astana qalasynyń áleýmettik-ekonomıkalyq damýy týraly qorytyndy esep berip jatyr. Bıyl qaladaǵy apatty úılerden 4,7 myń adam kóshiriledi.