Astanada 3 myń kólik quraldaryn gaz otynyna kóshirý josparlanýda

ASTANA. QazAqparat - Búgin Astanada qalalyq máslıhattyń kezekti sessııasy ótti. Oǵan Astana qalasy ákiminiń orynbasary Qosman Aıtmuhambetov, máslıhat hatshysy Sansyzbaı Esilov, qalalyq basqarmalar men aýdandardyń basshylary qatysty, dep habarlady elorda ákiminiń baspasóz qyzmeti.

Sessııada qalanyń ekologııalyq qaýipsizdigin qamtamasyz etý jáne qorshaǵan ortany qorǵaý, sondaı-aq, máslıhattyń keıbir sheshimderin ózgertý máseleleri talqylandy.

Astana qalasy ákiminiń orynbasary Qosman Aıtmuhambetovtyń aıtýynsha, búginde Astana qalasyn 2020 jylǵa deıingi damytý josparyn iske asyrý aıasynda ekologııalyq jaǵdaıdy jaqsartýǵa baılanysty basty baǵyttar aıqyndaldy.

- Atmosferany lastaýshy qaldyqtardyń jalpy salmaǵy 2014 jyly 165 myń tonnany quraǵan. Atmosferanyń lastaný ındeksiniń kórsetkishi - 3,7 birlik. Elordalyq áýe basseıniniń jaǵdaıy halyqtyń turmysy úshin óte qolaıly bolyp tabylady, - dedi Q. Aıtmuhametov.

Onyń aıtýynsha, lastanýdyń negizgi kózi - avtokólik quraldary (55,6%). JEO-1, JEO-2 sekildi energetıkalyq kásiporyndardyń úlesi 30,96% qurasa, basqa da lastaný kózderi - 15,74%, jeke sektordan lastaný - 9,4% paıyz boldy.

Іs-sharalar josparyna sáıkes, vedomstvo qaramaǵyndaǵy kásiporyndardyń 3 myńnan astam kóligin gazmotorly janarmaımen almastyrý kerek. Bundaı janarmaı túrin paıdalanǵan jaǵdaıda tútin shyǵý tómendep, qorǵasyn qospalarynyń paıda bolýy azaıady.

Sessııa barysynda qalalyq máslıhattyń «Astana qalasynda sý nysandarynda jalpy sýdy paıdalanýdyń erejeleri týraly», «Astana qalasynyń aýmaǵynda quryylys júrgizý erejeleri týraly» sheshimderine ózgerister engizildi.

Sessııa sońynda qalalyq máslıhattyń kelesi otyrysynda qaralatyn máseleler bekitildi.