Astanada 3 myń Rýbık kýbıginen Eltańba beınesi qurastyryldy
ASTANA. KAZINFORM — Memlekettik rámizder kúnine oraı Kazakhstan Speedcubing Federation komandasy erekshe patrıottyq aktsııa ótkizdi.
Olar elordadaǵy Nurjol býlvarynda 3 myńnan astam Rýbık tekshelerinen Eltańba beınesin jasady.
«Jastar rýhy» jastar qanatynyń tóraǵasy Aqerke Eskendirovanyń aıtýynsha, mundaı kreatıvti aktsııalar otandastarymyzdyń elge súıispenshiligin oıatý, memlekettik rámizderge qurmetin nyǵaıtý jáne belsendi azamattyq ustanym qalyptastyrý maqsatynda ótkiziledi.
— Memlekettik Eltańbanyń mán-maǵynasy tereńde jatyr. Onda halqymyzdyń ǵasyrlar boıǵy tarıhy kórinis tapqan. Shańyraq — beıbitshilik pen kelisimdi, tulpar — qýat-kúsh pen erkindikti, al bes buryshty juldyz — bolashaqqa kózqarasymyzdy beıneleıdi. Biz qalyptan tys tásilder arqyly patrıotızm qundylyqtaryn nasıhattaýǵa tyrysamyz. Jastarymyz memlekettik rámizdermen rýhanı baılanys baryn sezinip, olardy maqtan tutsa eken deımiz. Osyndaı aktsııalar azamattardyń Otanǵa súıispenshiligin, el erteńine degen jaýapkershilik sezimin oıatady, — dedi ol.
Kólemi 4×3 metrlik pannony qurastyrýǵa úzilissiz 10 saǵat jumsalǵan. Nátıjesinde táýelsiz Qazaqstannyń sımvolyna aınalǵan Eltańbanyń dálme-dál, pıkseldi beınesi ázirlendi.
Spıdkýbıng chempıony jáne Kazakhstan Speedcubing Federation uıymynyń jetekshisi Álıhan Ertursynnyń aıtýynsha, mundaı jobalar asa joǵary zeıin men komandanyń úılesimdi jumys isteýin talap etedi.
— Eskız jasaý úshin arnaıy kompıýterlik baǵdarlama kómegimen Eltańbanyń pıkseldi úlgisin ázirlep, ony bólikterge bóldik. Mundaı aýqymdy dúnıeni qurastyrý úlken jaýapkershilikti qajet etedi. Alaıda bul bizdiń alǵashqy tájirıbemiz emes. Elorda turǵyndary men qonaqtaryna erekshe ári áserli týyndy syılaı alǵanymyzdy maqtan tutamyz. Jalpy, Rýbık tekshesi — aqyl-oıdy, motorıkany, qımyl-qozǵalysty úılestirýge jáne barynsha zeıindi bolýǵa arnalǵan taptyrmas jattyǵý quraly, — dedi Á. Ertursyn.
Sonymen birge, búgin qala kósheleri men qoǵamdyq oryndarynda turǵyndarǵa memlekettik rámizder taqyrybyndaǵy vıktorınalyq suraqtar qoıylyp, belsendi qatysýshylarǵa estelik syılyqtar beriledi.
Qala turǵyndary men qonaqtaryna 3 myń dana shaǵyn jalaýsha taratylady, al kópqabatty turǵyn úılerdiń terezelerine 300-ge jýyq Tý ilinedi.
Aıta keteıik, Memleket basshysy Qasym-Jomart Toqaev elordadaǵy «Atameken» etnomemorıaldy kesheninde ótken Memlekettik tý kóterý rásimine qatysty.
Memlekettik rámizderi kúni Astanada 500-ge jýyq is-shara ótedi.