Astanada 3 myń dombyrashy bir mezette kúı shertip, rekord ornatty
ASTANA. KAZINFORM – Elordada bir mezette úsh myńnan asa dombyrashy «Balbyraýyn» kúıin oryndap, óner álemindegi bul erekshe jarqyn oqıǵa Qazaqstannyń Gınnes rekordtaryn tirkeý kitabyna endi, dep jazdy Astana ákimdigi.
«Qazaqstan» jeńil atletıkalyq sport kesheninde «Naǵyz qazaq qazaq emes, naǵyz qazaq – dombyra» atty aýqymdy is-sharada úsh myńnan astam astanalyq dombyra úıirmelerine qatysýshylar Qurmanǵazy Saǵyrbaıulynyń shoqtyǵy bıik «Balbyraýyn» kúıin bir mezgilde kúmbirletti.
«Qazaqstanda memlekettik shyǵarmashylyq tapsyrys jobasy 2021 jyldan bastap iske asyrylyp jatyr. Onyń maqsaty – 4 pen 17 jas aralyǵyndaǵy balalar men jasóspirimderdi tegin úıirmelermen qamtý, olardyń bos ýaqytyn tıimdi ótkizip, ónerge degen qyzyǵýshylyǵyn arttyrý. Mine, búgin Astana qalasynda osyndaı dombyra úıirmesine qatysatyn úsh myńnan asa oqýshyny jınap, bir mezette kúı oryndatyp, elimizdiń rekordtar kitabyna enýdi maqsat tuttyq. Ádette kúı úıirmesine qatysýshylar áýeli «Balbyraýyn» kúıinen bastap úırenedi ǵoı, sondyqtan kúı atasynyń osy daýylpaz kúıi tańdaldy. Sonymen qatar úıirmege qatysýshylardyń ónerin baǵalamaqpyz. Mundaı aýqymdaǵy is-shara elimizde alǵash ret uıymdastyrylyp otyr», - dedi Astana qalasy boıynsha memlekettik shyǵarmashylyq tapsyrysty iske asyrý mekemesiniń basshysy Erlan Jalǵas.
«Buǵan deıin eshqashan bir zalda 3200-den astam mýzykant kúı nemese basqa mýzykalyq shyǵarma oryndap kórgen joq. Bul jóninde osy is-shara osyǵan deıingi elimizde ornatylǵan rekordtardy basyp ozyp otyr. Álem boıynsha da eń úlken mýzykalyq rekordtardyń biri bolǵaly otyr deýimizge bolady. Dese de bizdiń negizgi maqsatymyz – el aımaǵy boıynsha Qazaqstan rekordtar kitabyna tirkeý. Al bul maqsatymyzǵa búgin tolyq jettik dep aıta alamyz. Osy protsesti arnaıy sarapshylarymyz baqylap otyrdy. Balalardyń sanyn 8 sarapshy, al kúıdiń oryndalý sapasyn 4 sarapshy saralady», - dedi Qazaqstan Gınnes rekordtar kitabynyń resmı ókili Qýandyq Qudaıbergenov.
Kúı merekesine mádenıet qaıratkeri Sholpan Qorǵanbek dırıjerlik etti.
Uıymdastyrýshylardyń aıtýynsha, aldaǵy ýaqytta da úıirmelerdiń qatysýymen osyndaı is-sharalar jıi ótkiziledi.
Aıta keteıik, Kólik mınıstrligi áýe kompanııalarymen birlesip, dombyrany ushaq bortynda alyp júrý máselesin talqylap jatyr. Bul týraly Kólik vıtse-mınıstri Sátjan Ablalıev Májiliste aıtty.
