Astanada 3 adamdy qutqarǵan órt sóndirýshi 80% kúıikpen jansaqtaý bóliminde jatyr
ASTANA. QazAqparat – Elordada kópqabatty úıdegi órtten 3 adamdy qutqarǵan órt sóndirýshi aýrýhanada hal ústinde jatyr, dep habarlaıdy QazAqparat elorda ákimdigine silteme jasap.
«Keshe Astanada B.Momyshuly dańǵylyndaǵy 15 qabatty úıde alapat órt boldy. Órt sóndirýshiler óz ómirin qaterge tigip, bes adamdy aman alyp shyǵardy. Olardyń biri – Asqar Zabıkýlın zardap shekkenderge kómekteskenimen, denesin qatty kúıik shalyp, qazir óte aýyr jaǵdaıda jatyr», - dep habarlaıdy elorda ákimdiginiń resmı saıty.
Órt kópqabatty úıdiń 11-qabatynda tutanǵan. Asqar Zabıkýlın páterge tereze arqyly kirý úshin qutqarý arqanymen 12-qabattan 11-qabatqa túsken. Іshke ený úshin qorshaýdy alyp tastaýyna týra keldi, ústindegi kamýflıaj kıimimen janyp jatqan páterge kirip, 80 jastaǵy ájeı men 22 jastaǵy nemeresin ottan shyǵarǵan.
Sonymen birge, órt sóndirýshi qoıý tútinnen shyǵa almaı, balkonǵa jasyrynyp qalǵan 10 jasar balany qutqaryp úlgergen.
«Asqar Zabıkýlın asqan jankeshtilikpen alapat órtten birneshe adamdy qutqaryp qaldy, alaıda ózi aýyr jaraqat alyp, óte qıyn jaǵdaıda jatyr. Órt sóndirýshige bettiń, arqanyń, ishtiń, aıaqtyń joǵarǵy jáne tómengi jaǵynyń 2-3 dárejeli kúıikteri, kúıik shogy degen dıagnoz qoıyldy. Zaqymdaný dárejesi – 80%. Qazir ol ókpeni jasandy jeldetý apparatynda jatyr», - deıdi ákimdik.
Aıta keteıik, keshe elordada kópqabatty úıde órt bolyp, 3 adam, onyń ishinde 1 bala aýrýhanaǵa túsken edi.
Foto: gov.kz