Astanada 3-6 jasar búldirshinderdiń 90 paıyzy balabaqshaǵa baryp júr
ASTANA. QazAqparat - Sońǵy jyldary balabaqsha kezegi 37 myńnan 18 myń adamǵa deıin qysqardy, dep habarlaıdy QazAqparat Astana ákimdiginiń resmı saıtyna silteme jasap.
3-6 jasar balalardy mektepke deıingi tárbıe jáne oqytýmen qamtý 2016 jyly - 70,6%, 2017 jyly - 78%-dy qurady. Ótken jyly bul kórsetkish 90%-ǵa deıin ósken bolatyn. Elordanyń bilim basqarmasy málimdegendeı, qazirgi tańda qalada 377 balabaqsha jumys istep tur. Onyń 96-sy - memlekettik, 232-si - jeke menshik, 3-i - vedomstvolyq balabaqshalar. Sonymen qatar, 46 shaǵyn ortalyq bar.
Elorda balabaqshalaryna 50 myńnan astam bala barady. Bul rette sońǵy eki jyl ishinde balalardy mektepke deıingi bilimmen qamtýda ilgerileý baıqalady. Osy tusta jeke sektordy tartý mańyzdy ról atqardy: ol mektepke deıingi bilimmen qamtylǵan balalardyń jalpy sanynyń 35%-yn jabady. 100% qamtýdy qamtamasyz etý úshin (63 myńnan astam bala) balabaqshalar jelisin keńeıtý maqsatyndaǵy jumystar jalǵasady. Sondaı-aq, olardy turǵyn úı keshenderiniń birinshi qabattarynan ashý josparlanyp otyr.
Aǵymdaǵy jyly 480 oryndyq eki balabaqsha paıdalanýǵa berilmek. Sondaı-aq, 720 oryndyq memlekettik-jekemenshik áriptestik kelisimsharty aıasynda eki balabaqshanyń qurylysy júrgizilip jatyr.
