Astanada 29 sáýir kúni jalpyqalalyq senbilik ótedi

ASTANA. QazAqparat - «Jasyl Astana» bir aılyq ekologııalyq aktsııasy aıasynda 29 sáýir kúni jalpyqalalyq senbilik ótedi, dep habarlaıdy QazAqparat elorda ákimdiginiń resmı saıtyna silteme jasap.

Elordada 8 sáýirden 6 mamyrǵa deıin «Jasyl Astana» dástúrli ekologııalyq aılyǵy ótedi. Onyń aıasynda kommýnaldyq jáne jalpyqalalyq birneshe senbilik uıymdastyrylady.

Eske salsaq, 8 sáýirde eńbek ujymdary men qala turǵyndarynyń kúshimen polıgonǵa 555,58 tonna qaldyq shyǵaryldy. Jalpy aýdany 2,5 mln sharshy metrden asatyn saıabaqtar men skverler qoqystan tazartylyp, aǵash otyrǵyzyldy.

Ekinshi kommýnaldyq senbilik 22 sáýir kúni ótti. Oǵan 3 203 adam, 222 kásiporyn men uıym qatysyp, 587 arnaıy tehnıka jumyldyryldy. Polıgonǵa 246,92 tonna qaldyq shyǵaryldy.

29 sáýirdegi senbilik kezinde uıymdar men kásiporyndardyń ujymdary óz aýmaǵynda aǵash otyrǵyzyp, qoqys jınaıdy, sondaı-aq sý aıdyndarynyń mańyn tazartady.

Aǵash otyrǵyzý ýchaskelerin naqtylaý úshin Astana qalasy aýdandary ákimderiniń apparattaryna habarlasýǵa bolady:
Almaty aýdany: Nurqanat Murat, [phone];
Baıqońyr aýdany: Nurbol Aıtbekov, [phone];
Saryarqa aýdany: Janseıit Tynbaev, [phone];
Esil aýdany: Jasulan Qyrǵyzbaev, [phone];
Nura aýdany: Rýslan Oralov, [phone].