Astanada 28-29 mamyr kúnderi jel kúsheıip, burshaq jaýýy múmkin
ASTANA. QazAqparat - Sınoptıkter Astanada 28-29 mamyr kúnderi aýa raıy buzylýy múmkin ekenin eskertedi. Bul týraly QazAqparat Astana qalasy ákiminiń baspasóz qyzmetine silteme jasap habarlaıdy.
«Qazgıdromet» RMK boljamyna sáıkes, 27 mamyr kúni kóshpeli bult júrip, tańerteń jáne kúndiz jaýyn jaýady (qar, jańbyr). Soltústik-shyǵystan ekpini 15-20 m/s, kúndiz 25 m/s jel soǵady. Aýa temperatýrasy túnde +3...+5°S, kúndiz +6...+8°S bolady.
Al 28 mamyr kúni kóshpeli bult júrip, túnde jáne kúndiz jaýyn jaýady. Kúndiz jańbyr jaýyp, qatty jel turyp, burshaq jaýady. Jel ońtústik-batystan sekýndyna 9-14 m/s jyldamdyqpen soǵyp, ekpini 15-20 m/s bolmaq. Aýa temperatýrasy túnde +0...+2°S, kúndiz +15...+17°S bolady dep kútilýde.
29 mamyr kúni kóshpeli bult shyǵady. Azdap jańbyr jaýady, naızaǵaı oınap, burshaq jaýýy múmkin. Jel ońtústik-batystan 9-14 jyldamdyqpen soǵady, jel ekpini 15-20 m\s. Aýa temperatýrasy túnde +6...+8°S, kúndiz +15...+17°S bolady.
