Astanada 27 jastaǵy qyzdyń kóliginen bir keliden astam mefedron tabyldy
ASTANA. KAZINFORM — Astanada esirtkiniń zańsyz aınalymyna qatysty kúdikpen 27 jastaǵy áıel ustaldy. Polıtsııa onyń kóligin tintý kezinde bir keliden astam mefedron tárkiledi.
Polıtsııanyń málimetinshe, jedel-izdestirý sharalary barysynda polıtseıler áıel basqarǵan kólikti toqtatqan. Kólik salonyn tekserý kezinde jol sómkesinen aq tústi untaq tárizdi zat salynǵan 20 orama tabylǵan.
Saraptama nátıjesinde olardyń quramynda mefedron bary anyqtaldy. Jeke tintý kezinde kúdiktiniń ózinen de osyǵan uqsas taǵy bir orama tárkilengen.
Budan bólek, áıel polıtsııaǵa buǵan deıin taǵy úsh orama jasyrylǵan úsh oryndy kórsetken. Ol jerlerden alynǵan zattardyń da mefedron ekeni saraptamamen rastaldy.
Osylaısha, tárkilengen esirtkiniń jalpy salmaǵy bir keliden asty.
Atalǵan fakti boıynsha qylmystyq is qozǵalyp, qazir tergeý júrgizilip jatyr. Polıtsııa esirtkini zańsyz saqtaý, tasymaldaý jáne ótkizý qylmystyq jaýapkershilikke ákep soǵatynyn eskertti.
Eske salaıyq, buǵan deıin Qazaqstanda esirtki qylmysyna qatysy bar 69 jasóspirim ustalǵanyn habarlaǵan edik.
