Astanada 27 mektep ashanasynan kemshilik tabyldy
ASTANA. QazAqparat - Máslıhat depýtattary, tutynýshylar quqyǵyn qorǵaý sarapshylary jáne bilim berý mekemeleriniń ókilderi orta mektep oqýshylarynyń durys tamaqtaný máselesin talqylady, dep habarlaıdy QazAqparat elorda ákimdiginiń medıa ortalyǵyna silteme jasap.
Jıynda mektep ashanalaryndaǵy tamaqtyń sapasy men ratsıonyna qatysty másele qozǵady.
«Jeke kásipkerler qyzmet kórsetetin mektep ashanalarynda mázirdegi tamaqtar talapqa saı kele bermeıdi. Taǵamdar daıyndalǵanda olqylyqtarǵa jol beriledi, tehnologııalar kóp jaǵdaıda saqtalmaıdy, tamaqtyń salmaǵy saı kelmeıdi. Jyl saıyn qyzmet kórsetýshi kompanııa aýysatyndyqtan ol atalǵan salada qajetti tájirıbe jınaqtap úlgere almaıdy», - dedi «Ádilet» tutynýshylar quqyǵyn qorǵaý birlestigi tóraǵasynyń orynbasary Tursyn Jaǵyparova.
Onyń aıtýynsha, qaladaǵy 47 mektepke tekseris júrgizilip, onyń 27-nen óreskel buzýshylyq anyqtaldy.
Osyǵan oraı qoǵamdyq belsendiler tıisti organdarǵa ata-analar men ÚEU birlesip mektep ashanasyndaǵy tamaqtyń sapasyna qatysty saraptama júrgizip, qajetti shara qabyldaý úshin baqylaýshy organdarǵa jiberý kerek degen pikirde. Sondaı-aq Tursyn Jaǵyparova mektep ashanalaryndaǵy baǵanyń qymbat ekenin de atap ótti.
«Kartop qosylǵan bálish - 100 teńge, al kompot - 80 teńge. Sońǵysynyń baǵasy tómen bolýy kerek ekenin eskerip, mektep ashanasyndaǵy baǵanyń shegin belgileý kerek. Buǵan qosa, tegin tamaqtaný somasyn 319 teńgeden 400-450 teńge deıin kóterip, tórtaptalyq as mázirin qaıta qaraý qajet. Bul rette mekteptik tamaqtaný kombınatyn qurý qajettiligi týyndaıdy», - dedi ol.
Aıta keteıik, 2011-2020 jyldarǵa arnalǵan memlekettik bilim berý baǵdarlamasyna mekteptik tamaqtanýdy jetildirý sharalary engizildi. Memlekettik-jekeshelik áriptestik negizinde 2020 jyly Astana men Almaty jáne oblys ortalyqtarynda 16 energoúnemdeýshi mektepterge taǵam daıyndaıtyn kombınat salý josparlanyp otyr.
