Astanada 27 eldiń 1100-den astam taekvondoshysy bas qosady
ASTANA. KAZINFORM – Maýsym aıynyń sońynda elordada taekvondodan álemdik deńgeıdegi eki iri halyqaralyq jarys ótedi.
22-23 maýsym kúnderi Jaqsylyq Úshkempirov atyndaǵy Jekpe-jek saraıynda Altaı taekvondo odaǵynyń tuńǵysh chempıonaty – Altaic Taekwondo Championships uıymdastyrylady. Al 25-27 maýsym aralyǵynda dástúrli Kazakhstan Open halyqaralyq reıtıngtik týrnıri ótedi.
Altaı taekvondo odaǵynyń alǵashqy chempıonaty eresekter men jastar arasynda ótkiziledi. G-1 sanatyndaǵy jarysta sportshylar álemdik reıtıngke qajetti upaılardy sarapqa salady.
Aıta ketý kerek, Altaı taekvondo odaǵy 2025 jyly Qytaıdyń Ýsı qalasynda ótken álem chempıonaty barysynda qurylǵan. Uıymǵa Altaı óńirine kiretin on eldiń ulttyq federatsııalary múshe. Onyń alǵashqy prezıdenti bolyp Qazaqstan taekvondo federatsııasynyń basshysy Kýdrát Shamıev saılanǵan.
Al 25-27 maýsym aralyǵynda ótetin Kazakhstan Open týrnırine álemniń 27 elinen 1106 sportshy qatysady dep kútilýde. Jarysta Armenııa, AQSh, Aýstralııa, Ázerbaıjan, Bahreın, Kanada, Úndistan, Iran, Qytaı, Ońtústik Koreıa, Túrkııa, Ózbekstan jáne basqa da elderdiń sportshylary baq synaıdy.
«Bıylǵy týrnırge Olımpıada chempıondary, álem jáne Azııa chempıondary qatysady. Olardyń qatarynda Olımpıada jeńimpazdary Pak The Djýn men Fıras Katýsı, sondaı-aq álemdik taekvondonyń basqa da tanymal juldyzdary bar. Bul jarys qazaqstandyq sportshylar úshin de mańyzdy synaq bolmaq», – dep habarlady uıymdastyrýshylar.
Qazaqstan quramasy sapynda Beıbarys Qablan, Batyrhan Tóleýǵalı, Aıdana Qumartaeva, Samırhon Ababakırov, Nodıra Ahmedova jáne Tamırlan Tleýles óner kórsetedi. Sonymen qatar jastar arasyndaǵy álem chempıonatynyń jeńimpazdary men júldegerleri de tatamıge shyǵady.
Kazakhstan Open – World Taekwondo uıymynyń resmı jarystar kúntizbesine engen bedeldi týrnırlerdiń biri. Jeńimpazdarǵa álemdik reıtıngtiń 10 upaıy, kúmis júldegerlerge 6 upaı, al qola júldegerlerge 3,6 upaı beriledi.
Jarystarǵa Dúnıejúzilik taekvondo federatsııasynyń prezıdenti Chýngvon Cho men Azııa taekvondo odaǵynyń jetekshileri de qatysady dep josparlanǵan.
Aıta keteıik, Qazaqstan 2026 jyly 20-ǵa jýyq halyqaralyq jarysty qabyldaıdy.
