Astanada 2,6 myńnan astam jumysshy qar kúrep jatyr

ASTANA. KAZINFORM — Elordada tolassyz qar jaýýyna baılanysty kommýnaldyq qyzmetter kúreý boıynsha táýlik boıy kúsheıtilgen rejımde jumys júrgizip jatyr, dep habarlaıdy qala ákimdiginiń resmı saıty.

22 jeltoqsan kúni kommýnaldyq qyzmetter elordadan 42 myń tekshe metrden astam qardy 3033 reıspen alyp shyqty. Sol sııaqty bul kúni qar kúreý jumysyna 2603 jol jumysshy men 1 595 arnaıy tehnıka jumyldyryldy. Qys mezgiliniń basynan bastap polıgondarǵa qaladan 105 695 reıs arqyly 1 mln 336 myń tekshe metrden astam qar shyǵaryldy.

Eń aldymen, erejege sáıkes, joldarda keptelis bolmas úshin qozǵalysy óte qarqyndy oryndar tazartylady.

Sondaı-aq, qarqyndylyǵy ortasha ýchaskeler — alańdar, vokzal mańy aýmaqtary, trotýarlar, áleýmettik nysandarǵa kirme joldar jáne t. b. tazartylady. Ortalyq kóshelerdi, jolaýshylar kóligi marshrýttary júretin oryndardy, aıaldamalar men trotýarlarda tazalaý da basymdyqqa ıe.

Qalada birneshe jabdyqtalǵan qar polıgony bar. Olar samosval tehnıkasynyń nómirlik belgilerin oqý júıesimen jabdyqtalǵan, munda beınebaqylaý kameralary ornatylyp, jaryqtandyrý qosylǵan.

— Elorda turǵyndary men qonaqtarynan joldarda abaı bolýdy, qaýipsizdik erejelerin saqtaýdy, daýyldy eskertý bolǵan jaǵdaıda alys saparlarǵa shyqpaýdy suraımyz. Tótenshe jaǵdaı týyndaǵan kezde «112» nómirine habarlasyńyz, — delingen habarlamada.

Aıta keteıik, buǵan deıin elordanyń ortalyq saıabaǵynda shańǵy maýsymynyń ashylýy ótetini málim boldy.